جوانی ویلے اِکو شُغل ہا
رُوپ وٹا کوئی سانگ کھیڈنا
دسِیں پندھرِیں دِنِیں،
کدے پُلسِیا، گنڈھ کپّ
گاہک کدے ہٹوانیا
ٹونا پِیری، کُھسر فقیری،
ڈھیر تماشے کیتے ویکھے،
ایس سڑک تے یاد آیائے اِک واری
مانگت بنی میں بیٹھا ہویاں
گاواں پیا
''لینا ای جو لَیندا جا
دینا ای جو دیندا جا''،
آیائے اِک عُمروں میرا ای ہانی
نوٹ دساں دا کڈھ میرے ول کِیتاسُو،
آہناں ''رکھ کول
میں جو ای لیناں
جو ای دیناں''
''جو تے میرے کول نہیوں''
ہسدا لنگھ گیائے نوٹ کِھیسے وچ پا
کُجھ چِر مگروں مُڑ آیائے
اُڑ میرے ول گنویو سُو
''جو ہووے سو دینا
جو دیوے کوئی لینا''
''جو تے لبھ لیایائیں تُوں،
بہہ جا نال تے آئے گئے نُوں دیندا جا''
''ویہل نہیں''
''کیہنوں دِتی آ''
''گھر نُوں ادّھی دفتر نُوں''
''تاں کُجھ نہیں تیرے کول رہیا؟''
''بس لنگھ جو سُنیا لِتا
جو بنیا کہہ دِتا
ایہا ای کول اے
ایہا ای کول نہیں''