فرید بھنڈار

گُن تے ہِکّا ای ہا

قُدرت دِتا کُل ہوند نُوں

اوہ ہا نینہہ1،

اوہا ای تت ہا کرت ورت دا،

لاہے2 دی جاں تَس3 اندراں وِچ پسری

کَھس4 دِیاں لاہاں5 رگاں تھیاں

لوہُو6 لابھ7 ہویا،

ہُن ہتھ سکھنے8 پئے آہندے نیں

دبکِیل9 لوکیر10 دے اندر

اوس مُڈھلے گُن دی جاگ جگاون کِیتے

سِیر11 دی کِھیر پکا اساں رل کھانی اے

1- نینہہ= عِشق، پیار- 2- لاہا= نفع- 3- تَس= تریہہ، پیاس- 4- کَھس= کھوہن-

5- لاہاں= رسیاں- 6- لوہُو= لہو- 7- لابھ= مُنافع- 8- سکھنے= خالی-

9- دبکِیل= دب جاون ہار- 10- لوکیر= خلقت- 11- سِیر= سانجھ-