کتیں سن ستاراں
وِیہہ سَو نہیں
اُنّی سو ستاراں
وِیہہ سو والے ستاراں دا تے ادھ پوہ پیا ہوندائے،
چلو خیر اے گل کرو تُسیں اگلی
ہاں تے پھیر کتیں سن ستاراں وِچ
روس اندر جو ہویا جو نہ ہویا
جُگاں دبیجی آس مراد نوں ہُجکا جیہا تاں لگا ای
جِتھے کِتے وی
جیویں کیویں وی لگا
سہی تے کیتا ہوسی دبیلاں
سُجھی تا ہوسی اوہناں نوں
رل آہر اساں وی وِڈئیے وسیبا نواں کرن دا کوئی
آہر ایہہ ہویا وی
سریا کِتے نہ سَریا
جُوڑیاں جُڑیاں، ہلجُل ہوئی
گَھٹ خلقت وِچ، سُوجھواناں وِچ بَوہتی
سُوجھ نوں تت جے کرنہار خلقت دا من وی لیّے اساں
تاں سُوجھوانی اپنی نوں کِتھے دھرئیے
سچی گل جے سُوجھواناں نوں عقل وی خلقت نیڑے ڈُھکیاں ای آوندی اے
پر خلقت نوں چِر سُوجھواناں دی سُنن گولن وِچ کیوں لگدائے
بے وساہی ہوندی اے خبرے؟
سپین چ ہلجُل کُجھ ودھیرے ہوئی
شاہی پُرانی اوتھوں چُکیجی
ایہہ سن بتی دی گل جے
اُنّی سو بتی دی
پندراں ورھے سنتالی نوں اجے رہندے نیں
چھڈو کھیہڑا سنتالی دا
اسیں تے چھڈنے آں اوہدا کھیہڑا
اوہ نہیں ساڈا چھڈدی
کیہ کرئیے چلو اگلی کرو
ہاں تے پھیر چُکیجی شاہی پُرانی سپینوں
ایہہ سپین اوہا ہسپانیہ جے
تھوڑا چِر پہلوں ای
خونِ مسلماں دا جیہڑا امین ہویا سی،
لؤ جی شاہی اُٹھ گئی
عاماں رل کے بندوبست سمھالیا
ایہہ رنگ سیاست دا
نیتی بدنیتی دا
راس وال تے جر نہیں سکدے
سو سن چھتّی وِچ لوک راج نوں گھیرا گھتیونیں
لڑائی لگ گئی
لوک راج دی راکھی کرن لئی
دیس دیس چوں آہری بوہڑے
وِچ جوڑک لِکھیار وی آہے
جاناں کئیاں دِتیاں
پیرو دیس دا جوڑک
لِکھیا 'سیزر ولیجو’ جاندائے بولیا ‘سے سر بایے ہو'
اوہ وی اوتھے ہا
اوہنے جو کافیاں لِکھیاں
کافی تہانوں پتہ ای خبرے
کُجھ لکھیار نیں جیہڑے حمد ثنا ای نہیں
ہر رنگ دے جوڑ نوں کافی آہندے نیں
اوہناں بھانے کافی کاوی جوڑ جوڑن دے کم دا ناں اے
چلو گل اگلی کرو
پھس لفظاں وِچ جاندے او
ہے مار تہانوں ایہا شیخ جی
ہاں تے پھیر جی سن اٹھتّی وِچ سپینی لوک راج ٹھپیجا
جرنیلی حکومت ٹُھک گئی
'سے سر بایے ہو' وی سن اٹھتّی وِچ ای پُورا ہویا
سپینے نہیں وڈھیجا
پیرس پرت کے ماندا ہویا تے مویا
بھیت اوہدی ویدن دا
اوس ویلے دے ڈاکٹراں نوں لبھا کوئی نہ
ویدن اوہدی وی شاعری اوہدی ورگی ہووے خبرے
چلو اگے گل مکاؤ وی ہُن
ہاں تے پھیر لؤ کافی سُن لؤ
ویہل تُساں جے کڈھ لئی ایڈی لمی گل سُنن لئی
تاں ایہہ وی نِکی جیہی سُن لؤ
تھوڑی جیہی ہور کڈھ کے ویہل
پتہ اے سانوں سَیل فون نوں اکھوں پروکھا کرن
کوئی گل نہیں ایویں جیہی
ترلا ای جے من جاؤ تاں
سیل فون تے ایہنوں چڑھا کے ''سِری بَھین دی'' ایہدی نہ کروایو
نالے ساڈی وی
ہاں تے پھیر لؤ سُن لؤ کافی:
'جدوں لڑائی مُکی
اوہ لڑدا ماریا گیا
اِک جنا کول آیا اوہدے:
نہ مریں، پیار میرے دا خیال کریں،
ہاڑا لوتھ پر مردی گئی
دو ہور کول اوہدے آئے
ویکھیں سانوں چھڈ نہ جاویں
سنبھل، جیون ول آ
ہاڑا لوتھ پر مردی گئی
ویہہ پنج ویہاں ہزاراں سینکڑے ہور ول اوہدے آئے روندے
سُرجن پیاریا موڑ موت نوں، موڑ
ہاڑا لوتھ پر مردی گئی
لکھاں جُڑے دوالے
اِکو ای ترلا کرن
بھراوُ چھڈ کے نہ جاویں
ہاڑا لوتھ پر مردی گئی
وت کُل جِیا جُون جگت دی
آن دوالے اوہدے کھلوتی
لوتھ اُداسی جھات اوہناں تے پائی
ہلجُل ہوئی کوئی اندروں
اُٹھ اوہ کھلوتا ہولی ہولی
اِک ساہمنے کھلے نوں پائی جَپھی
رل سبھناں نال ٹُریا،
دسدے نیں پارکھ گُڑھے سیانے
لکھی 'ولیجو' دی
نہں سچ آکھی 'بایے ہو' دی
تھوڑی کیتیاں بجُھی نہیں جے جاندی
پڑھت کرن اوہدی پیچ داری دی
سمجھو مت پڑھیار دی مارن والی گل ہوئی کہ
جے پارکھ ٹھیک آہندے نیں
غلط آکھ نہیں سکدے ایڈے گُڑھے سیانے کسبی
تاں ایس کافی وِچ لگدائے خبرے 'بایے ہو'
پیچ کَس کِتے رکھ کے بُھل گیا اے
ویکھو تُسیں وی…… خبرے