میں نکل دَروَزیوں سڑکوں لہہ گیاں
گھا تے بہہ گیاں
اخباراں والے ای کہندے نیں ایہنوں باغ بیرون فلانا
اصل تے ایہہ ہُن پڑدہ باغ اے
سُوٹے پُڑی لئی مُنڈے کُڑی لئی
اِک پاسے نالا پولی تھین اے
دُوجے پاسے پِٹھ ہٹیاں دی ہگن چِھلڑ خالی ڈبے
وِچ کوڈیاں سَٹ کے چوسر کھیڈن والے بابے
ہُن وی بہندے نیں
بابیاں اُتے لاون والا کوئی پِھرے تے پِھر جائے
مجمعے والے وی ہُن باہر ای رہندے نیں
چِٹی داڑھی چِٹی پگ تے چِٹا تہمت کُڑتا
میں بیٹھاں اوہ آیا ئے
کولوں لنگھ گیائے مُڑ کے تکیوس، چھابا میں لہایائے
بہہ گیائے
چھابے وِچوں بسکٹ مینوں کھوایائے
میں پنج رُپئے دِتے نیں
بسکٹ پنج لفافے پا کیتے نیں میرے اگے
قبر پرانی نال اے
اُتے ناں کوئی نہیں
دِیوے والے تھاں اے کالی
''ڈھیری کیہدی جے؟''
''میری نہیں
ہونی اے کسے ڈھیر آلے دی
بسکٹ ویچ دی ہوندی تے میں تینوں دس دیندا
کیوں پُچھنائیں؟''
''ایویں''
''ایویں پُچھدا ای پھڑیا جاندائے بندہ''
میں ہسناں
''بس، ہسیا تے پھسیا
آیائیں تے کڈھ سُوہ ڈھیری دی پِھر کے''
''اینا چر تسیں پھرے تہانوں پتہ نہ لگا
مینوں کتھوں لگنائے''
''تے میں کوئی ایہنوں پھریاں
جیہنوں پھریاں اوہدا پُچھ میں دسناں''
''کون سی''
''سی کیوں؟ ہے''
''کون اے؟''
ایہو''
''بسکُٹ؟''
''ایہو
ایہدے نال اسیں لاواں لئیاں
ماں میری روندی ٹُر گئی
میں مکھے نہیوں دوجا کرنا
اِکدے رہیے پیر استاد نے دسیا
اندر جوئی باہر سوئی
پیر استاد میرے لَڑ پارسیاں دا پھڑیا سی بُڈھڑے بُڈھڑی دا
اوہ گورے دے بیت آہے بمبیؤں''
''لِیہہ لِیہہ'' اِک چوسر توں اُٹھ کے جلی پاؤندا آیائے
''لِیہہ لِیہہ'' بابے تھیلا بھر کے اوہنوں پھڑایائے
اوہ دس رُپیے ایہدے ای سِر توں وار کے ایہنوں دے گیائے
بِسکٹ مگر تسیں کیوں لگ پئے''
''کھیل مُرمُرے تہمت داڑھی
کَس نِکر ایہہ بُوٹ کھڑ کَے
گورے پَٹ تے کُولیاں گلھاں
بستہ وِچوں خستہ
جیدھر گیائے ایہنوں فتحیا فتحیا
مصر شام کیہ برما بصرہ
کیہ افریکہ چین ملایا''
کورا جیہا اِک گورا آیائے
بی بی دیسی نال پنجاہ پچونجاں دی
''ہاؤ مچ؟''
ٹین رُپیز'' میں آہناں
گورے تھیلا چایائے بسکٹ بی بی دے مُونہہ لایائے
''نہیں توں آپے کھا- یہ پرائیویٹوں کے کام ہیں''
لوا جیہا اِک لنگھدا بِسکٹ کھا کے مینوں آکھ گیائے
''بھائن رپیہ دنیا میرا''
میں دِتا ئے
''کِنا وتر کِنا سیک اے
تِھندا میدا مِٹھا لُونا
ایہہ تے ہوئی اُتلی اُتلی
وِچلی اوہا جانے جیہڑا بِسکٹ ہو جائے وِچوں''
اِک آیائے بھر تھیلا وَگیائے
''ایہدے مگر سُدائی ہوئی خُدائی سمندر پار گئی
اوتھے مِیلاں فیکٹریاں وِچ پک پک بندائے
پیکٹ سج مشہوری چڑھدائے
سٹھ ورھے اسیں ایہدی پیریں جھاواں پھیر نہایائے ایتھے
آپ پوایائے آپ کھوایا ئے
ایہہ سچا تاں اسیں آں سچے
ایہہ کُوڑا اسیں کُوڑے
کیہ مٹھیاں کیہ پُوڑے
جی جی نوں ایہدا بدن چکھایائے
گرمی سرد تے نگھا سردی
ایویں جگ نوایائے؟''
پہلوان جیہا آیائے لٹکدا، دس رُپیے دھر کے آہندائے
''یار نوں چنگا لگائے تھیلا دیو نہ بابیو''
جاندا بسکٹ میرے مونہہ وچ پا گیا ئے
ہور اِک آیائے
ڈھیری اُتے دس رُپیے دھر کے آہندائے
''سری لنکا اور تیرے کولوں لے گیا نا تھیلا
اِک چار دا ریٹ دِتو سُو
اکھے بابا پھیری آلا مگرے آوے ای آوے
میں چار اِک دا ڈھیری آلے بابے نوں دِتا
ایہنے تینوں پکڑ بہایا''
بابے ڈھیریوں دس رُپیے چائے
اوہدے مونہہ وچ بسکٹ دے کے آہندائے
''صدقے جاواں دس اِک دا کھا توں ایہدے ناں دا جوانیاں مانیں''
اوہ ویہہ رُپیے دھر کے تھیلے دو لے گیائے
اُٹھیائے بابا واج بدل گئی
''بسکٹ وِس کُٹ
وِس دی رُڈھ پُرانی
جیہنوں چڑھے اوہ لہہ جاندی اے پھیر بزار نہیں بہندی
ہائے بسکٹ وِس کُٹ
نہ مِلدوں تے کُٹ جیلاں وِچ پیندی''
میں چوایائے چھابا
بالاں والی اکھ شیطانی تکدا ہیٹھوں آکھ گیائے
''ناں ناں والے کول رہن دے توں کیہ کرنائے
ڈھیری دی کر پھیری لہائی آپنی لے توں''