[شپّے دے تھڑے تے
نُوری فتُوری تے مگنُو ونگاری دی
گل پئی ہوندی اے]
نُوری فتُوری: مگنُو جی
اج جیہڑی مائی تھڑے تے آئی اے
اوہدا تُہاڈا کیہ سانگا اے
مگنُو ونگاری: ساڈی مُہری اے تنواری
اوسے ای جاگ ونگاری
مینوں لائی اے،
پِنڈو پِنڈ جا
گھرو گھر اپڑ
کُل خُدائی نُوں جاگو رین کِھڈائی اے،
(شپّا اندروں تھڑے تے آیا اے)
شپّا: آ نا نُورِئیے فتُورِئیے
مِل تنواری اواری نُوں
مگنُو ونگاری: یار شپّیا
جی کردا اے ہڑَپّ تینوں کر جاواں
سانُوں راہے پاونہاری نُوں
اواری پیا کرینا ایں
تنِواری: (اندروں تھڑے تے آ کے)
جے ان آئی واری لَین
ساڈے جیہیاں نمانیاں نہ آون،
چنانہہ دے کنڈھے تے
عزت بیگاں کولوں
کُلیاں نہ پواون،
گھڑیاں نُوں ڈِھڈ تھلے رکھ کے
تاری نہ لاون
تاں اوہ فقیر نہ ہوون
وڈیریاں دیگاں دے کفگِیر ہو جاون
شپّا: ہُن دس وئی مگنُو، کیہ صلاح اے
گگن تے ای رہنا ای
کہ لہہ تھڑے تے آونا ای