جھاڑُو کہ بَوہکر؟
]لہور 1939-
مال روڈ، انگریزی اخبار سِوَل اینڈ مِلٹری گزٹ دا دفتر-
اسسٹنٹ ایڈیٹر اَینی سٹِیوَنسن اپنے کمرے وِچ بیٹھی اے- رپورٹر بَوبی سَین آیا اے دروازے تے[
اَینی: کم اِن بَوبی
بَوبی: گُڈ مَورننگ میڈم (اندر آیائے)
اَینی: فِٹے مُونہہ
بَوبی: کوئی بُھل ہوئی اے تے مافی مَیڈم
اَینی: دُرفِٹے مُونہہ، اوہو میڈم میڈم
بَوبی: سَوری اَینی- لَت پے گئی اے
اَینی: ہَیں، کیہنے ماری اے؟
بَوبی: (ہسدا بہہ گیا اے) نوکری نے اَینی- پر دُرفِٹے مُونہہ دا بڑا سواد آیا اے
(نچن دا پینترا)
اَینی: آہا…… نچ نا…… سوہنا لگنا ایں
بَوبی: اسیں کیہ اَینی- سوہن تے سارا تُسیں مَلّی بیٹھے او
اَینی: اچھا تے سوہن دی وی مَل مالکی ہوندی اے
بَوبی: تے ہور نہیں؟ ویکھو نا، تُسیں انگریز، میں چُوہڑا
اَینی: توبہ کر- دوئے کرِسچن آں اسیں
بَوبی: ویکھو نا، پیو میرا طبیلہ سوتدا ہا چودھری تافے دا- لِد سانبھدا سانبھدا گھوڑیاں دی رُوح دا جانُو ہو گیا- چودھری تافے کوچوان کر لیتا اپنا- پیسے وی کُجھ ودھا دِتے- میں وی پڑھنے پے گیا- رِڑھ کِھڑ کے بی اے کر لیتا- تُسیں رپورٹر رکھ لیتا- پر ویکھو نا چُوہڑ تے ہویا میرا تت ست اوہ میں کیویں چھڈاں تے کیوں چھڈاں
اَینی: دِن رات تے تیرے رپورٹنگ وچ لنگھدے نیں بَوبی- چُوہڑ کیہڑے ویلے کماونا ایں
بَوبی: ہر ویلے- رپورٹنگ جھاڑُو اے نا میرا
اَینی: اوہ کیویں
بَوبی: اکھ میری رپورٹ دے پِچھے رہندی اے- کیہڑے میل دی گل اے- دبیاں دی دابُواں دی؟ کیہڑے راہوں ٹُردی آئی اے؟
اَینی: پر بَوبی، رپورٹ تے نِرپکھ ہونی چاہیدی اے نا، جیویں ہوئی جو ہوئی- جے اوہدے وچ اپنے سبھا دا جھاڑُو پِھر جائے تاں اوہ اصل توں پرے نہیں ہو ویندی؟
بَوبی: اصل ہے کیہ اَینی؟ میل ونڈ مُڈھ نہیں ساڈی وسوں دا؟ ساڈی ای نہیں کُل جہان دی وسوں دا؟
اَینی: ایہہ تے تیری وچار لِیہہ اے نا
بَوبی: تُہاڈی کیہ اے اَینی
اَینی: دُر
بَوبی: میں میڈم تے نہیں آکھیا تُہانُوں
اَینی: دُر دُر
بَوبی: خبرے کیہ کر بیٹھاں
اَینی: اوہو ای ہور کیہ- اگے میڈم تے ہُن تُہاڈی تُہانُوں، تیری تینوں کیوں نہیں
بَوبی: وڈے جو ہوئے تُسیں اَینی
اَینی: کِنی، دادی لگنی آں تینوں کہ پڑنانی؟
بَوبی: تُسیں افسر اسیں ماتحت، تُسیں انگریز اسیں چوہڑے
اَینی: آہو، تُسیں اسیں …… کر جتھے بندی، کڈھ مینوں ایتھوں تے آپ چڑھ بہہ ایس کُرسی تے…… سچی دساں بَوبی، میں وی چُوہڑی آں، پیو انگریز تے ماں چُوہڑی- میں پیو دی دِھی ہوون پاروں ایس کُرسی تے بیٹھی آں - پر وِچوں دِھی ماں دی آں - پتہ ای جنرل ڈائر ماما سی میرا- اوہدی ماں ماسی سی میری ماں دی- پر اوہ پیو دا پُتر سی- اوہنے ماں دے چُوہڑ تے پڑدا پاون لئی کیتی جو کیتی جلیانوالے، ماں اوہدیاں خاباں وچ پھیرے پاوندی آہی- سو اپنے اندروں اوہنوں مار کڈھن دا حِیلہ ہا سارا- پر ماں ماں ای آہی- اوہ پُتر دی کیتی دے تھلے اپنا جھاڑُو دھر گئی- جلیانوالیوں بھگت سِنگھ جمیا
بَوبی: ہُوں …… ٹھیک اے- بھگت سِنگھ انگریز نُوں کڈھ کے اوہدی کُرسی تے نہیں سی بہنا چاہوندا- اوہ پُوری کُرسی بازی نُوں ای جھاڑُو پھیرُو ہا
اِک جی: (بُوہیوں) آ سکناں اندر؟
اَینی: کیوں مِیرُو، پیر تیرے کیہ آہندے نیں، نہیں آ سکدا تُوں؟
(مِیرُو ہسدا اندر لنگھ آیا اے)
اَینی: مِل ایہنوں، ایہہ بَوبی سَین ای رپورٹر ساڈا،
بَوبی، ایہہ مِیر سرنواز ای- سَر خطاب نہیں ایہدا، ''تاج کے سَر ہو گئے اقبال'' والا1، ایہدے ناں دا انگ ای- سرنواز بھرتی ہو گیا فوج وچ تے سَر سَر کردا اوس دستے وچ آ گیا جیہنے ڈائر دے حُکم تے گولی ورھائی جلیانوالے…… کھڑ نا مِیرُو ایہنوں جلیانوالے اپنے
مِیرُو: اکھیاں مِیٹو نا جی جَھٹ دا جَھٹ
بَوبی: لؤ جی (اکھیاں مِیٹیاں سُ) اگے ای مِیٹی بیٹھے آں - کھولو نا تُسیں ……
1-
پہلے تو وہ تھے تاجِ سرِ مِلّتِ بیضا
اب اور سُنو، تاج کے سَر ہو گئے اقبال
(عبدُالمجید سالک دا شعر، اقبال نُوں سَر دا خطاب مِلن دے موقع تے لِکھیا)
]جلیانوالہ باغ- ڈائر منچ تے، نال سپاہی- وچ مِیرُو وی[
ڈائر: فائر (گولیاں چلاوندے نیں سپاہی- مِیرُو دے ہتھ کنبدے نیں پئے، بندوق نہیں چلدی، ہتھوں ڈَھے پئی اے- مِیرُو چاون لئی اُڑیا اے، ڈائر ڈِگی بندوق تے پیر دھر کے مِیرُو نُوں سینتر نال پاسے کھلہار دِتا اے-)
مِیرُو: کھول گِھنو اکھاں بَوبی صاحب
بَوبی: اکھاں تے کھول دِتیاں نی ہُن، وکھا نا ایہناں نُوں جو ہوئی اگے- ہاں اِک گل اے- میں صاحب شاہب کوئی نہیں -
اَینی: ایہہ میم ای میرے ورگی مِیرُو
مِیرُو: مافی- تیرے کولوں وی بَوبی تے اَینی تیرے کولوں وی
بَوبی: میں وی ایہو جیہی کر کے مافی منگی ہئی اَینی کنوں، وئی مینوں لت لگی ہوئی اے نوکری دی لائی- لگدائے تینوں وی لگی اے اوہو
مِیرُو: آہو- پر میں ڈائر دی وگائی لت پھڑ چِھکی تے اوہ تِلکیا- مینوں فوج چوں کڈھ دِتونیں - ہور کوئی سزا نہیں مِلی- میرا ریکارڈ چنگا ہا- پھیر اَینی مینوں گارڈ دا کم دِتا گھر تے- دسیئم ایہنوں ہُن بندوق نہیں چلنی میتھوں - آکھیوس ایسے کیتے تے رکھیائے تینوں - ایہہ بندوق ہُن جھاڑُو اے تیرا
بَوبی: (ہس کے جپھی پائی اے مِیرُو نُوں) اپنی برادری وچ ای آ رلیا ایں یار- ہُن ہا جھاڑُو پھیرنا ایں تُوں ایہناں دے، نہ سچ، ایہدے گھر
اَینی: دس نا، مِیرُو ایہنوں کیہدے گھر رہنا ایں
مِیرُو: اپنے
بَوبی: کِتھے اے اوہ
مِیرُو: اوتھے ای
بَوبی: تیرا ای ہویا نا اوہ
مِیرُو: نہ میرا نہ اَینی دا، رہنے اسیں دوئے آں اوتھے
اَینی: کوئی سنیہا دین آیا ایں مینوں؟
مِیرُو: میرے کول یُوسف داس آیا ہا- میں آکھیا دس آواں تینوں - ایہہ وی اوہناں وچ ای ہا جیہناں گولی کھادی جلیانوالے
اَینی: چلا گیا اے اوہ؟
مِیرُو: نہیں نال اے میرے
اَینی: تاں مِلا نا سانُوں
(مِیرُو اُٹھ کے بُوہا کھول باہر سینتر کیتوس، اِک وڈکا اندر آیا اے ستراں پنجھتراں دا، سِر تے پگ تے چِٹی داڑھی)
مِیرُو: سائِیں دسو نا پتہ اپنا
وڈکا: میں یُوسف داس آں جی- سکھر ہوناں
اَینی: یُوسف داس…… ایہہ عربی ناں اے ہِندی؟
یُوسف: اوہ وی تے اوہ وی- دوئے اِک نیں
اَینی: تُسیں ہِندو او کہ مُسلمان؟
یُوسف: نہ اوہ نہ او
اَینی: اوہ وی تے اوہ وی؟
یُوسف: ایویں آکھ گِھنو، ہِکا گل اے
بَوبی: (ہس کے) ساڈی برادری
اَینی: سُنیا اے تُہانُوں وی گولی لگی ہئی جلیانوالے
یُوسف: جی
اَینی: تُسیں اُتھاں کیوں جا وڑے
یُوسف: گل لمی نہ ہو ونجے، تُہاڈے کم دا حرج……
اَینی: ایہو تے کم اے ساڈا، آئے گئے دی سُنن
یُوسف: نانک یُوسف دا ناں تے سُنیا ہوسی تُساں
بَوبی: کلام وی سُنیا ہویائے اوہناں دا (نچ کے
ویکھ چُکے سنسار کی بازی
اگلی ویکھو چل بازار،
جنجل ہے ایس جگت میں جیون
قسم سچے سرور سردار،
کھیال خُدائی خُدا بلاوے
بِرہے کا بے رنگ اسرار،
سرکش عِشق میرے من آیا
شاہنشاہ شَوری ہسوار،
اپنا حُکم بُلاتا وہ ہی
عاشق ہوتا بے اختیار،
کھیال اناالحق حق ہو بولے
کُفر اسلام کہاں دم یار،
جب تک مرنا تب تک جِینا
محبوباں سنگ سدا بہار
یُوسف: آہا (دھمال دی سینتر) آپنیاں وچ ای آ گئے آں …… میں نانک یُوسف دیاں داساں دی لڑی وچوں ہاں - اوہ سچل سائِیں دے چیل بیلی آہے
بَوبی: چیل…… بیل……
یُوسف: اصلوں - چیلا وی تے بیلی وی
بَوبی: اوہ وی تے اوہ وی- نہ اوہ نہ اوہ
یُوسف: آہا، دونویں ہِک- سچل سائِیں دے آون توں کُجھ ورھے پہلوں جھوک وسی شاہ عنایت والی
بَوبی: جتھاں کُجھ کِسے دا نہ ہا تے سبھ کُجھ سبھ دا ہا
یُوسف: اوہا- سچل سائِیں دیاں چیل بیلیاں …… چیل بیلچیاں آکھ گِھنو…… جگت نُوں جھوک کرن دی دھاری- سچل سائِیں نُوں سُوہ آہی- اوہناں دی جیہناں آپو اپنی جُوہے جھوکاں وسائیاں - راوی تے وسی نانکی جھوک دے وی اوہ جانُو مانُو آہے کرتار پور والی دے- تُساں پچُھیا ہا میں جلیانوالے کیوں جا وڑیا- ہویا ایہہ جو میریاں سنگیاں نُوں سار ہوئی وئی ایتھے وی اوہ لہر مُڑ وگی اے- اوہناں مینوں ٹوریا ونج مِل اُتھاں ساڈیاں ساجِھیاں نُوں، میں آیا تے چکھی ترنگ شہر گرائِیں سجناں دے میلے دی
اَینی: پتہ ہا تُہانُوں ایتھے انگریز راج اے
یُوسف: اُتھاں وی ہا نا
مِیرُو: سو تُساں تیار ای آہے گولی کھاون لئی
اَینی: ہُن کِتھے ہوندے او
یُوسف: اِتھاں وی اُتھاں وی
اَینی: کِتے وی نہیں پر سبھنِیں جائِیں (نِرت سینتر)
(یُوسف گاوندا اے، سبھ رَلے نیں)
رہاؤ
کون کہہ موڑن کَڑیاں وے کڑیاں وے کڑیاں
آہی مینوں ونجن دی جھوک،
طرف یاراں دی قدم جو چاون
راہ ایہیں وچ آپ چلاون
دبِیجی کد وت مُول نہ مڑیاں،
عشق والیاں نُوں کاف کیہ کردے
جے وچ محبت مر کر تردے
کھیہہ نہ لاون کھڑیاں،
درد منداں سِر مَوج خُدائی
مِینہہ مہر دے وسن سدا ای
جگ مگ ساون جھڑیاں،
تانگھ جیہناں نُوں یُوسف سچ دی
اوَر اوہناں دِل محبت مچدی
سے گڈ جانب جڑیاں