وَلاں دو ودھیاں نیں
اِک توری دی
بسنت پھُلاں دی رُکھ پرواراں دے اَسّو متھیاں اُتے
ایہنے کِھڑائی اے،
دُوجی پیازی پھُلِیاں دے تھال
دھر دھر تروور سِراں تے میلہ مدن لواندی اے پئی،
اُبھر دو وانس کوارے پُکارن پئے کولوں
نی بھلِیو
وَلو لُکاؤ سانُوں وی اندر اپنے،
باہر رنگ لواؤ،
نہیں تے ایہناں کر ٹُھمنے ’میں‘ اپنی دے
سانوں تمبواں ہیٹھ گڈاونا جے،
دُکھ سُکھ کردیاں ساڈیاں مُونہاں وِچ
لاؤڈ سپِیکر ٹھوک دینے نیں اپنے،
بنھ متھیاں تے جھنڈیاں دے کفگِیرے
دیگ دعوے وِچ سانوں پِھراونا جے