وڈی ساری کوٹھی اے
دو منزلی
کندھ چوپھیرے ولّاں کجی
اندر بُوٹے بِرچھ بہوں رنگے،
پھاٹک لنگھو اندر آؤ
پنج کاراں کھڑیاں نیں جوڑ اگاڑ پچھاڑ
وِچوں نِمھا ساہ تاء پٹرول دا سردائے،
اگانہہ آؤ تاں پِچھلی کندھ نال ٹین دا چھپّر
چونکیدار ڈرائیور بہہ اخبار دی اُردو پڑھدے نیں،
اِک ول اِتھاں وی ہے
ادھ چھپر وِچ ادھ باہر،
چھپر چھاویں ننگ مننگ دھڑ
سِر ساوے پتر لال پُھل نیں دُھپے
رسی سُوتر دی گل پا ایہہ ول
پتلے لوہے دے تھم نال بجھی کھڑی اے،
چھپروں لنگھدیاں
ول تے بیٹھا کاں بولدا روز ای سُنناں
اج کھلو گیاں
کیہ پیا کُوکدائے؟
مینوں ویکھ تے نہیں پیا کُوک سُناوندا سبھ نوں؟
'کوئی آیا جے'
یا اپنا سنگ سداؤندا اے پیا
'آؤ رل کھائیے کِتوں'،
رسی نوں وی وِچ وِچ ٹُمبدائے
خبرے ول دے گلوں ایہہ پھاہی لاہون دا ترلا اے
کہ ٹُھونگ اپنی نوں لارا لاون دا،
کاں کاں صدیاں توں آکھدے جیہنوں آئے آں
کاں کاں تے نہیں
ہاں ہاں تاں تاں ہے کہ خبرے تَیں مَیں میں تَیں
اِکے کُجھ ہور،
مطلب کیہ ہے
اِکمُٹھ ہو رل کھائیے
کہ کھوہ کھس کرئیے
کُوک ایہدی نوں ناواں اساں بنایا
ناں اپنے دی بانگ سُناونا مُلاں ایہنوں کرایا،
ایہہ کُوک بھلا کُجھ ہور نہ کہندی ہووے
اپنے ہوون دا پتہ تے ایہنوں دیندی ہی اے
ایہہ وی آکھیندی ہووے متاں سبھ جِیا جُون نوں
'بھری بھراتی جاء ایہہ اصلوں واندی جے
رلو کوئی وسو وساؤ'