باہروں وج گئے دروازے
اندروں باری لیّے کھول
واء نال پُچھ دس کر لیّے
دُھوں دُھوڑ زناہی جَتّھے تینڈا چھڈیا کیہ اے
حرام حلال کیہ دھریا کڈھیائے
اچن چیت واء ہوئی اگیرے
بُل بُلیں لا کھولے
پولے پولے حرف چار اساں جِبھ اوہدی توں رولے
‘‘بھن جندرا الماری کھول’’
جھٹ لگ ای گیا
وِچ تکیا
کِتاب اِک جِلد بند
وَل پُھل نقش نقوش چُفیرے
خوش خط نستعلِیق قلم
نُسخو نُسخی ورقو ورقی
اپنے آپ نوں غَیر، غَیر نوں شہر کیویں کرنا اے
جی جی وِچ رِزق وِتّھ کیویں دھرنی اے
وِتّھ عِلم دی اُتّے کیویں مڑھنی اے
وِتھ نے درجہ کیویں ہونائے تے درجے کِنج تقدیر منارے چڑھنا اے
کِس ترتیبے ناڑیں ایہہ نُسخے لاہونے نیں
رَت وِچ کیہڑے حساب رلاونے نیں
نالو نال ہدایت حاشیئے
کِتنے وُضو کر ایس کتاب نوں پڑھنا اے-
ویکھ حیرانی ساڈی واء مُسکائی
‘‘جندرے دی لوڑ نہیں ہُن
وَیب سائیٹ تے سارا کُجھ مِل جاندا اے’’