ایہہ دس چودھری
کدوں دا تُوں سرکاری چَرکَھڑا ڈاہی بیٹھائیں،
پالیاں کُولیاں پُونیاں ساڈی سانجھ لگن دیاں
کس وٹ وکھر وَیر دے دھاگے
کر کر پِنّے چڑھائی آونائیں منڈی اٹیرن اُتّے،
ٹَیم ٹَیم وِچوں آڑھتیاں کولوں گھسّا لوا
مِل واناں کولوں نتھ کُھلوائی لینا ایں،
ہٹّی منجے اُتّے لِٹا
ہیٹھوں بتوّا ہو مشہُورِیاں چلینا ایں
بتوا= اوہ چکلا ملازم جیہڑا پیشہ کردی جنی دے پلنگ دے تھلے لُک کے بھوگ سواد دِیاں نقلی واجاں کڈھ کے گاہک نُوں رِیجھاؤندا اے- (بتولا، بتولیا)-
مشہُورِیاں = اِشتہار-