میں آکھیائے:
''اوہا ای نیں
جیہڑے تُوں پاوندا آیائیں
کوٹ شرٹ پتلُون،
کیہ بنیاں
اج لڑفے لتھے ہوئے نیں،
بٹن وی کوئی نہیں
اُدھڑی پئی اے ساری سلائی''
ہس کے آہندائے:
''ہوندی اے اوہا لِکھی جو متھے ہووے''،
ہسی آں میں وی:
''ست پُشتا محرابیا متھا تیرا،
پِچھلے جرم سَیں پنج وقتا
یا خبرے درباری سکندر ذوالقرنَین دا،
اج مچھندر ناتھ تینوں کِتے ٹکر گیائے
ہُن چلیائیں ٹِلے گورکھ ہوون،
آہندائے نیڑے ہو کے:
''وردی آہی وار پوائی،
کار تیری رُوپ وٹا وچ وڑ گئی اے
لاہ مارے نی اوہنے بِلّے
لِیرولِیر کرائی اے
اپنی پوائی آپے،
دیہہ میری
ننگ نینہہ انگاں سنگ رلائی اے''