''لؤ کُڑِیو، پھڑو ایہہ چابی پُرانے گھر دی،
کھول ویکھنا پِچھلا اندر
دھریاں ہوئیاں نیں اوتھے چھپیاں
اٹھاراں سو سٹھ سَتّر دِیاں،
ہِن کُجھ ہتھ لِکھیاں وی پُرانیاں
اوہناں چ اوہ وی اے
ورقہ ورقہ جوڑ پروتی
حال جیہدے وِچ اوس بھُچال دی چال دا دسیا ہویا اے
جیہڑا سہج سبھائیں رلیاں دِیناں1 مسکِیناں
قِلعیاں کوٹاں وِچ آندا،
حاشِیہ اوہ وی پڑھ لینا:
ایہہ بھُچال سُتّا پیا اے دھرت دی بُکّل وِچ
کِسے ویلے وی اچن اچیتی
1- دِیناں (جمع دِین) دِین= کنگال، بہت غریب-
جاگ ایہنوں آ سکدی اے''،
''ہسدے کیوں ہُن پئے او ماسی''
''دھرتی تے برساتی نہیں نا
دونہہ مِنٹاں دی گل وِچ گھنٹہ ادّھا لاوے
دسیؤ ایہہ میرے شپچُو نُوں''
''ماسی نچیئے تُہاڈے نال جی پیا کردا اے''
''آؤ
آہا،
اساں تُساں ای دھرت ہاں اڑِیو
اوہ سُتا کوئی نہیں پِیا
ساڈی نِرت ای ہے اوہ بھُچال''
تریوے نچ پئیاں گاوندیاں نیں،
''ہُلّو، ہُسڑی جُون نُوں ہُل کے کرو نہال''
اندروں تنواراں مِیئیں گنڈوئے دِیاں آوندیاں نیں