سرور (پندراں ورھیاں دی): خان گڑھ دے کول گراں اے
اُتھاں نانی میڈی دا گھر اے
آل دوالے ریت تے مِٹی رلی ہوئی اے
کُجھ نہیں اُگدا
پر تھوڑا پرے
مِٹی سُچیری تھی ویندی اے
اُتھاں دھان وی ہو ویندا اے
تے واڑ وی،
نِکیاں ہوندیاں دی گل اے
اِک واری اساں واڑ کپن گئیاں نا
پرتیاں تے نانی اُنگلاں ویکھیاں
نانی: پھٹ لوا آئیاں او نا
کوئی گل نہیں
سبھ نُوں لگدے نیں
سانُوں وی لگے آہے،
پر رکھو تسَلّا
ایہو کار ای ہتھ پکیرے کرسی تُساڈے، بہو اجن
(نانی تیل لیا ملیا اے ساڈیاں اُنگلاں تے
اسیں بہہ کے کھیڈاں بنینیاں
نِکے نِکے ٹوئے بن ویندے نیں
جِتھاں پیر دھری دے نیں
پارو: ہا ٹویا تیڈا گھر اے نا چورا
(گُوڑھے کالے رنگ دا وڈا کیڑا چور اکھویندا اے)
اساں کوِیلیاں ہاں
تُوں پکڑ کھانا اے سانُوں
جدن وی اساں ٹوئے وِچ وڑنیاں،
آ ہُن پھد نا
گُھرنی: تُوں آیا ایں
اساں باہر سرن دا جتن کرینیاں ہاں
ریت ڈھیندی اے ٹوئے وِچ تے
اساں گاونیاں ہاں
]سرور پارو گُھرنی تریوے اُٹھ نچ گاوندیاں نیں [
چورا وے چورا
کوِیلی تیڈا گھر بھنیندی اے
رہن دی تینڈے کول اساں جا چھڈنی کوئی نہیں
سانُوں پکڑ کھاون دی
تینڈیاں ہتھاں پیراں وِچ واہ چھڈنی کوئی نہیں
سرور: ساڈی کپّی واڑ تے
دانداں وگائے ریڑھیاں اُتے لَدیجی
خاناں دے ڈیرے ٹُر ویندی اے
بھوئیں دی مالکی اوہناں کول جو ہوئی
پشتو پُشتی سانُوں دَل کے
اپنے ناں لکھیجی
پارو: آپے ای خان منڈیال وی نیں
ساڈی گھال تے چَسّ ڈھال
ویچدے، ویچ منال بنیندے نیں
اوہدے سِر تے ناں دی کُرسی مل کے
ساتھے حُکم چلیندے نیں
ودھ توں ودھ امیری کھٹدے نیں
ودھ توں ودھ غریبی ساڈے ول سٹدے نیں
گُھرنی: جو پیا ہوندا اے- سمجھ اسانُوں
اوہدی چروکی اے- پر ساڈی سمجھ دے اُتے
ریت مُلانی کیری ویندی اے گھنیری،
اساں منوتی اگے کریندیاں آئیاں ہاں
پر ہُن اساں چھنڈ کے اُٹھیاں ہاں،
سار تھئی اے سنسکار دی
کامل پکیائی
سُچی گھڑت
سنسکار ہے کار اساں کوِیلیاں دی
ایہا سنسن رگ ہے
ساڈی جُڑت اندروکی
ایہدے نال اساں سانجھ بھوَن
جگ تے سار وسانا اے