فرید بھنڈار

ایہہ گل مینوں نانے مینڈے آپ سُنائی

جیویں اوہدے نال ورتی

میں راوی دیس پیا گھوڑا بھجائی ویناں

سوتے ویلائے

اپر بدل

تارے منڈاسا کر گئے نیں

مینڈا ناؤں ہے راوی دیاں اسواراں وِچ

‘‘ساہ لویں جھٹ راہیا وے گھوڑے والیا’’

چِھک راساں میں پرت ویکھیائے

سوانی ادھکھڑ

‘‘جھامرے وینائیں؟’’

‘‘ہا’’

‘‘کوہ اُرانہہ لاہ دیویں’’

‘‘بہو پِچھے’’

بہندی کول ہوئی

سہی میں کیتا نیتر نظر نہیں کوئی

میں گھوڑا ٹوریائے

‘‘وگائی آ جیویں آیائیں مینڈا دھیان نہ کر’’

میں گھوڑا بھجا دِتائے

اوہ اڈول بیٹھی اے

‘‘لاہ گیائے کوئی اِتھے؟’’

‘‘کیہڑا کوئی’’

چور چڑیل نہ ہووے واہن، میں سوچیا

ہور نہیں مُڑ پچُھی

گھڑیاں لنگھیاں نیں

‘‘ویکھیں نا، راہے ای ہیں؟’’

سہی کیتم نہیں راہ تے گھوڑا

میں واگاں ڈِھلیاں چھوڑیاں نیں

ایہہ ویہار ہا راوی دیاں اسواراں دا

راہ بُھلو تاں واگاں ڈِھلیاں چھوڑ دیو

گھوڑا آپے راہ پے ویندائے

گھڑی ہور لنگھی

اوہ آہدی اے ‘‘گھوڑا وی بُھلی ودا ای’’

میں رُکیاں

‘‘دے بانگ کوئی بوہڑے’’

ایہہ پرانا طور اے راہی پاہی دا

کویلی بانگ دسیندی اے کوئی اوکڑ بن گئی اے

میں اجھکیاں، دو جی آئے نیں

‘‘کِدے وینا ای راء؟’’

جھامرے

‘‘سجّے داء پیا وینائیں کھبے بھوا’’

میں بھوَیاں راہ سہی تھیائے

جھامریوں کوہ اُرانہہ اوہ لہندی آہندی اے

‘‘گھوڑا اٹیر اجے’’

ادھی صدی لنگھ گئی اے

دُنیا ہور ہوئی اے

بے نظریاں اکھیاں اوہدیاں کیہ مینوں آکھ گئیاں نیں

ایہہ اجن سہی نہیں ہویا