پہلی جھاکی
1946- اِک وڈی حویلی دی اُپرلی منزل دے ویڑھے وِچ کھارے دی رسم پئی تھیندی اے- کمّی نائن رِیتل کسبی چج نال کرویندی اے پئی رسم- سٹھ ستر دے گیڑ وِچ ہوسی کمّی- نِکّا قد پتلا پُھرتِیلا سریر- سبھا دی ترِکھی تے چوکنّی- ڈھولکی پئی وجدی اے- گاون پئی گاوندی اے کمّی- ہور سُنن والیاں وی نال رل گاوندیاں نیں پئیاں- "رانجھن والی بیڑی میں آپے چڑھ گئی آں"- کمّی گھر دِیاں دو دو وڈیریاں بِیبیاں دے جُٹ بنا کے کھارے اگے کریندی اے- (کھارا اِک پِیہڑھی اے)-اوہ اِک دُوجی دا ہتھ پھڑ کے بے ملُومی جیہی نچن دی سینتر نال کھارا ٹپدیاں نیں تے وِچ وِچ ڈُسکدیاں تے اتھرُو پُونجھدیاں نیں- چوکھے جی پروار دے، تریمتاں نال، دوالے بیٹھے نیں- وِچ چِیٹُو وی اے بارھاں چوداں ورھیاں دا- آپو آپنی واری مُکا کے بِیبیاں کمّی دے آسن تے لاگ دھریندیاں نیں-