فرید بھنڈار

(اوہا ماڑی جیہی لوئ- الہ دین اپنے گھر وچ- کھیس دوالے ولیا ہویائے- بوہا کھڑکیائے- الہ دین کُنڈی لاہی اے- تارو آئی اے-)

تارو: سُکے نہیں کپڑے؟

الہ دین: جَھڑ ہو گیائے- کاپی؟ (تارو دِیوا کڈھ کے الہ دین نوں دِتا اے اوہ حیران ویکھدا اے)

تارو: ایہہ بالن والا نہیں ( رگڑا لاون دی سینت) الہ دین رگڑیائے دیوا- جِن آ گیائے موبائل تے گل کریندا- وڈا افسر لگدا اے)

جِن: (موبائل تے) بس ٹھیک اے- میں دسناں ہُنے- رائیٹ- الہ دین نوں) سَر سَر- سبھ کجھ ارینج ہو گیائے- تہانوں کُجھ دسن دی ضرورت نہیں- میں جِن کاہداں جے کلائنٹ دی رکوائرمنٹ دا پہلے ای پتہ نہ ہووے مینوں- بلاک ٹُو سیکٹر بی- نمبر ٹرِپل ٹُو- ویہہ بیڈ روم- سویمنگ پول- جِم- گولف کورس-( تارو گل کرن لگی اے)

مَیڈم مَیڈم- سیکرٹریز ہاؤس وکھرا اے- گیسٹ ہاؤس وکھرا- سَرونٹس بلاک وکھرا- پنجاہ نوکراں واسطے-(گل کرن لگی اے) میڈم میڈم پلیز مینوں پورا پتہ اے- ایہہ کارڈ اے سَر- پوری دُنیا وچ جتھے چاہو جو چاہو- اَن لِمٹیڈکریڈٹ- ( الہ دین کارڈ لے لیائے)

جِن: (پِچھے سینت کر کے) تہاڈے نال ای اے بالکُل بیک سائیڈ تے- تُسیں ہُنے شِفٹ کر سکدے او- فُلی فرنشڈ- وِد سَرونٹس اِن یونیفارم- آل کائینڈز اَوف ٹرانسپورٹ- مینوں اجازت- میں بے موسمے پھلاں دے پکَن دا ارینجمنٹ کراؤنائے سَر- تہاڈے شفٹ کرن توں پہلاں- (جُھک کے) سَر- میڈم- ( ٹُر گیائے موبائل کَن تے)

(تارو تے الہ دین پِچھے ہنیرے وچ گئے نیں -اوتھوں)

الہ دین: مار اوئے- اُستاد ڈِھبری تے خاب وچ وی ایہہ نہیں ویکھ سکدا

تارو: اسیں دو جی کیہ کرساں ایڈا گھر-

الہ دین: (لوئے آ کے) گل ای کوئی نہیں- میں سارے سکول دے کُڑیاں مُنڈے لے آونے نیں سنے ٹبراں دے- تے سارے مُنڈے رکشا باڈی ورکشاپ والے- پھیر وی بچ گئی تھاں تے اُستاد ڈِھبری وی آ جاوے- ماسی سُگری وی- اوہدی یونین وی-

تارو: (لوئے آ کے) ایہہ بو خبرے کاہدی اے ترکی ہوئی- جیویں کوئی جنور موئے ہوون چروکنے-

الہ دین: (پِچھے جا کے) اوہ- گندا نالہ اے اماں-راوی جیڈا- اوئے ہوئے ہوئے- مچھر قورمہ- (لوئے آ کے) کتھے گیائے اوہ ( دیوا رگڑیاس- جِن حاضر)

جِن: سَر سَر سَر- مینوں پتہ اے- نالے دا معاملہ سَر- ویری ویری سَوری- ویری ویری سوری- میں پہلے نہیں دس سکیا- ذرا جِنی پروبلم اے ایہدے وچ- تُسیں سمجھ جاسو- سِسٹم- گل ہے وی کجھ نہیں تے ہے وی اے- ایہہ اوہ مُندری والا اے نا سَر- رہیا اے تہاڈی سَروس وچ وی- اوہدے لَیول دا کم اے- ہے تے اوہ میرے اَنڈر ای- کافی تھلے- ڈاون بِیلو- میں کدیں اِنٹرفیئیر نہیں کیتا ہیٹھلیاں دے کم وِچ- چھوٹیاں چھوٹیاں گلاں نال وڈِیاں خرابیاں پیدا ہوندیاں نیں- تُسیں جاندے او سَر جو حال ہو گیائے سِسٹم دا- اوہدا کلائنٹ اجکل اوہ جادوگر اے- میک اپ ماسٹر- اوہنوں کہو کہاؤ کِسے کولوں- نہیں تے پتہ کرو کیہ منگدائے- دے دیو- ہر اِک دی پرائس ہوندی اے- گڑبڑ کرے تے کورٹ وچ لے جاؤ- وکیل کرو وڈے توں وڈا- نو پروبلم سَر- اَن لمٹیڈ کریڈٹ- ( ٹُر گیا اے- جِن گیا اے تے چھوٹا مِرکانا آ گیا اے- نال تھانیدار تے وکیل)

وکیل: (کاغذ وکھا کے) تیرا اپنا بیان ای بی بی- مِرکانا پیلس توں تُوں دیوا چرا کے لیائی ایں(کھنگورا) دو تاریخ نوں دو وج کے دو منٹ تے- (کھنگ) ٹھنڈ بڑی اے ایتھے مِرکانا صاحب-

تھانیدار: ہُنے چل پیندائے ہیٹر-

تارو: میں کوئی بیان شیان نہیں دِتا-

تھانیدار: ( الہ دین کولوں دِیوا کھوہ کے، اوہنوں ساہمنے کر کے) ایہہ ویکھاں تیرا ای اے بیان کہ شیان اے کسے ہور دا- مال برآمد ہو گیائے تہاڈے کولوں- آؤ نہ نال میرے- تصدیق تھانے چل کراونے آں-

الہ دین: تُسیں میک اپ والے تے نہیں سارے-

تھانیدار: آ ہو پُتر کرنے آ ں میک اپ تینوں وی- برآمدگی تیرے کولوں ای ہوئی اے-

چھوٹا مِرکانا: (وکیل تے تھانیدار نوں پرے کر کے) تارو اجے وی ویلا ای میں بھیج دیناں ایہناں نوں واپس- کیہ جانائے تیرا -سگوں تیرا حق بن جاسی میرے تے ہیں- میں دِیوے ای دِیوے کر دیساں گھر تیرے جے شوق اے مُنڈے نوں تے- اسیں تے بناونے آں ایہہ کھڈونے- ہیں- ویلا ای- من جا- اجے وی-

وکیل: کیوں جی مِرکانا صاحب ہو گیائے عدالتوں باہر تصفیہ- ساڈی فیس وی وچے ای جے- ہیں جی-

تھانیدار: تے ساڈا خرچ پٹھا وی  ہیں جی- ایف آئی آر دی واپسی تے ہور پواڑے-

چھوٹا مِرکانا: تارو ویلا ای- ایہہ بڑے گھٹیا لوک نی- میں نہیں چاہوندا توں ایہناں دے وس پویں- پر نہ سُنن دی عادت نہیوں مینوں میں ترلے ای سُنے نیں وڈِیاں وڈِیاں دے- فیصلہ تیرے تے ای-

( ہنیرا)