جھاکی 1
[کندھی سروور دی، نچ تریندیاں مہیاں، جَھڑ بیلے وِچ ہاتھی ہاتھناں دی رل کھیڈ، مہیں رل گاوندیاں نیں، مچھیاں مگّر وی رل گئے نیں ]
ہلا بیلِیو سانگا سہجل ساڈا
تت ست نُوں نویلا پیا کریندا اے
(ہاتھی ہاتھناں ہور جناور، پکھو، کِیڑیاں، ڈڈُّو، سپنیاں، استھائی بنا رلے نیں)
نی سیؤ میل اساڈا
چِھنو چِھن البیلا
(منس جُون دِیاں جنیاں جنے وی رلے نیں - پہلوں رِڑھدے، گوڈیاں بھار ہوئے، وت پَیراں پرنے تھی کَھلے نیں)
جھاکی 2
(کُھلّا پاہا- مہیئاں، ہاتھناں)
اِک ہاتھن: نی اڑِیو،
ہاتھ ساتھنو، کیہ دساں
سانُوں ایہناں دھروئی منساں
ہیر گھیر کے، ڈک دبیڑ کے
اپنی کاٹھی لاٹھی کِیتا ہویا اے
اِک مہیں: سانُوں وی ایہناں پا نیترے
پَروَس نال سِیتا ہویا اے
چووَن کارن، بال اساڈے کوہن کارن،
دُوجی: ماڑِیاں جنِیاں ایہناں دِیاں
گوہا اساڈا گو پاتھیاں لاوندیاں نیں
نیڑ سیک دی مان سیال ولاوندیاں نیں
دُوجی ہاتھن: رُکھ نُوں پاڑ بھکھائی پِٹدی بھا دے سر تے دیگاں دھر کے
تُہاڈیاں پُتراں دا ماس پیا پکیندا اے
سِیر تُساڈا گل بل ایہناں نُوں کِھیر کھویندا اے
پہلی ہاتھن: چوبھاں ایہناں دی چاکری بدھیاں مہاوتاں دِیاں
سانُوں موڑ مُڑیندیاں نیں
کنڈاں تے چائی وتنِیاں پالکِیاں
ایہناں دِیاں مالکِیاں
دُوجی: سُنڈ سلامی کر کر نر حُکم تے
ہِک بئی نُوں متھے مار مرینیاں ہاں
سُنڈاں ہک دُوجی دِیاں پئیاں کپوینیاں ہاں،
دسّو نی کیہ ہو سکدا اے ہُن
پہلی مہِیں: گوہا تُہاڈا تُلیا بدھا ہوندا اے
پولا اساڈا
آؤ گُنھ تھپ کے بھوئیں تے
پاتھیاں کرینِیاں
دُوجی: بھائِیں پُھوکینِیاں
طبیلے حویلے ایہناں دبیڑن ہاراں دے
سَکھنے ہوئے مُونجھ مَلیندے ہتھاں ایہناں دیاں نُوں
چیتے کرینیاں
سِیرل جِیون دِیاں نینہہ ترنگاں
تریجی مہِیں: تر تر سروور نچدِیاں
تکنا اساں
تُہانوں بیلے حال کھیڈیندیاں
رل گاونا سبھناں اساں
کِیڑیاں چِڑِیاں
ترِیجی ہاتھن: مُد مگروں
ایہہ منس جُون وی سَری بھوئیں تے
رُکھاں ایہناں نُوں پتر سارے کھوانے
پُھل سُنگھاونے
پَھل چُنگھاونے،
دُوجی ہاتھن: وت ایہناں اَوڑاں نبیڑن لئی
دینہہ دی لوڑوں ودھ اُپایا
ودھ نُوں لانبھے سانبھ دھرایا
سانبھنہاراں وِچ ملّ دی موہ سری
کرتیاں دے اوہ بھرتے بن گئے
دوالے حاکمی ویڑھی
پہلی مہِیں: ناراں نراں ادھین کیتیاں
پا رسیاں
کر کر ڈِھلیاں کسیاں
باندھاں ہو مہِین وانداں جاپن لگیاں
دُوجی: ایہہ سارے بھُلیکھے لاہے نیں اساں
چِت مُڑ ہرے ہوئے نیں
ہریوں لال گُلال
دینہہ دِیوالی
رَین دھمال
(گاون دا واج دُوروں نیڑے تِھیا اے)
سانگا سہجل ساڈا
تت ست نُوں نویلا پیا کریندا اے
سارِیاں مہِیاں ہاتھناں:
نی سئیو میل اساڈا
چِھنو چِھن البیلا
(منس جنِیاں رِڑھدیاں وڑِیاں نیں،
وت گوڈیاں بھار ہوئیاں
تے پیراں پرنے ہو رلیاں نیں جناورنیاں نال،
گاون سبھناں دا سانجھا تھیا اے)