لا لؤ حاضری ساڈی وی سائیں
جے ہووے منظوری،
ورھے چار سو
گورے وپاری
کوٹھیاں کوٹھے پائی آئے،
کِیتی کتری ہِین ہتھاں دی
سلّھ جہاز لدائی آئے،
وڈے اساڈے منصب نسبی
اُچ حویلیاں وِچ وسیندے
گھڑ گھڑوا رنگوا کُرسیاں میزاں پلنگ لوڑیندے
کوٹھے کوٹھیاں اندر پیش کرائی آئے،
سن سنتالی چاڑھ
ٹُر گئے ایتھوں گورے وپاری جنگ تے جِتّی ہار
ہُن کار وپار تے اوتھوں بیٹھ چلیندے نیں پئے
کوٹھے کوٹھیاں
وڈیاں ساڈیاں دے ناں لا گئے
جِت ہَری دے ہار گل اوہناں دے پا گئے،
وڈیاں دے اساں اُچھاڑ تے نِت بدلائی آئے آں
کیہ کرئیے پر
ایہو جاپدائے
سن سنتالی چاڑھ وپاری ٹُر گئے جیہڑے
اوتھے بیٹھے اندر اساڈے وس گئے نیں
کُھل بھرم دی سیج بھوگیندیاں انگ اساڈے گھس گئے نیں،
سڑکے بہہ کے ستر ورھے تُساں گنڈھیاں جُتیاں
سائیں نُوری حضوری
ہُن سردی ایہا ارداس
ٹانکا سُوتر سانوں وی لا دیو
پا دیو پلّے ساڈے بھورا وجود شہُود ایس گل دا