پڑدادا میرا
نِکیاں ہوندیاں کندھ نال بیٹھا کھیڈے
اُتوں کھکھر چِھڑ پئی اوس جاپی کوئی نہ
مائی ہسّاں کوئی آہی
اوس ویکھیا دسیں نہ کِسے نوں چنگا رہسیں
مُڑ وی گل اوہ نکل گئی
اِک دِن وانڈھے گیا ہووے
اوتھے بال پئے کھیڈن لُکن مِیٹی
آکھن اودھر جانا ہے نہیں
اودھر کھکھر چھڑی ہوئی اے
اوس آکھیا میرے ہوندیاں کِسے نوں بُھونڈ نہیں لڑ سکدے
اودھر مِیٹی دین گیا تے کٹھے پنج ست لَڑ گئے
اوسے دن دا بُھونڈ کمشنر ناں پیا اوہدا
اگوں اَل ایہہ بن گئی ساڈی
دادے ہوراں نوں میں پُچھیا اِکواریں تہانوں بُرا نہیں لگدا
‘‘ بَچڑا کمشنر کِسے وی گل دے ہوئیے
ساڈے وارے وِچ اے’’
دادے ہوراں پہلی جنگ وِچ بھرتی دِتی
گھوڑی پال مربّے لَبھے
خان بہادر ہو گئے
پِنڈوں باہر سڑک تے کوٹھی پائی
بندا باہر کھلونا
کوئی کار وی آؤندی ہووے
اوہنے اندر دسنا
خان بہادر صاحب اُٹھ کے باہر آؤنا
جاندی کار نوں بانہہ ہلار سلامی دینی
اِکواری ابّے ہوراں آکھیا
میاں جی افسر ہووے کوئی تے ٹھیک اے
ہر کار لئی باہر آؤنا نہیں بندا
‘‘ بھولا بچڑا کیہڑی کار وِچ افسر ہونائے کون جاندائے’’
لہور میں پڑھیاں باہر وی پڑھیاں
ہُن پُتراں دے پُتر ایتھے پڑھدے نیں پئے
بھونڈ دا مطلب ہور ہوگیائے
میں اوہناں نوں آہناں
اجے وی وارے وِچ اے بچڑا
جے کوئی تہانوں بھونڈ کمشنر آکھے