جی آہندا اے، پَیرو
تُساں تے سِر توں گھنے اُچیرے او
سیانے پلو پل جُڑدی سیانپ اپنی نُوں
گنڈھ ٹُک کے جوڑ سِراں وِچ
عِلم اُسرَگے اُساردے نیں
ویہاری زوراوری دی کھوہ کھس نُوں
پرکھ نِرکھ کے اوڑک
تھک ہاردے نیں
تے اوہناں وِچوں ای وِرلے ایانے
سراں نُوں پیراں وِچ فقیراں دے
چا دھردے نیں
چُم اوہناں نُوں آہندے نیں
ہوئی ورتی اُلٹاون دی
سَک جیہڑی سردی آئی اے تہاڈے اندروں
اوہ سانُوں دان کرو
تے آکھو ہَلو ہُن
ٹوئے ٹِبے لاہ کے مَن میدان کرو
1-فریدا من میدان کر ٹوئے ٹِبے لاہ
اگے مُول نہ آوسی دوجک سندی بھا
(فرید)