اِکو سکُولے دوئے پڑھاؤندے آہے
بیلی پُرانے
ویہلے ہو کے گپ شپ کریندے آہے
مُسلمان ہوون دی جُڑت وی آہی
پر نالو نال ای فرقے بندی دی تِڑک وی
اِک دیہاڑے اوسے تِڑک پاروں
اِک نے دُوجے نُوں چَنڈ کڈھ ماری
کھادی جیہنے اوہ گھر ٹُر گیا
بھتریجے بھنیویں لے کے پرتیا
چنڈ دے وَٹے ڈِھڈ ٹکراں کھوائیانس
یار پُرانے نُوں
سکُول دا موہری رٹائیر ہوون والا ہا
''کوئی حیا کرو اوئے'' ‘
کُوکاں ماردا بھنویا دوالے
کر کے اپنی تسَلّا
اِک تے پرت گیا گھر
دُوا پگ سانبھ کے بہہ گیا کُرسی تے
سکول دے موہری لِکھ رپورٹ جاں اُپر ٹوری
بِھڑے بیلیاں دونہاں نُوں چُھٹی
نَوکریوں ڈِھی گئی،
لبھ گئے کم تے ہور
کَھیہہ کھہیڑ وی ودھ ودھ گَھٹدی گئی
مِلن گِلن مُڑ لگ پئے دونویں،
اوڑک سار تھئی نیں:
''یار ایہہ مِلن دی تانگھ تے بندے اندر
ہے پُرانی،
کُجھ گَھٹ پُرانی اِکدُوجے کنوں
اگیرے ہوون دی تانگھ اے،
مذہب دی گل تے اصل گل نُوں
بُرخا پواون دا چارہ اے''