اندروں باہر نکلیاں
گھنٹہ کُرسی بیٹھ پڑھائی لکھائی مگروں
دو مِنٹاں دی سیر لئی
راہ وِچ پکھنو پھٹڑ پیا اے
لالی اے
سر لہو لِبڑیا
اُڑ میں دونہہ اُنگلاں وِچ پر پھڑ
راہوں پرے سٹی اے
سہی تھیا اے
سٹن ویلے کوئی درد نہ لالی دا ہا ہتھ نوں
سگوں کالھ آہی راہ صاف کرن دی اپنا
ذرا جیہی کریہت وی آہی اوس ادھ موئی کنوں
ڈر دی چھوہ وی
متے بماری نہ کوئی ہوویس
چلو نظم تے سَر گئی
نمبر بناون والی دوش نموشی نُوں
ذرا پرے وی کر گئی،
تکنے آں
بھلی ہووے جے اُڈ گئی ہووے،
نہیں، اُتھاں ای اے
مر گئی اے، نہیں ساہ تے ہے سو
آسو آئی اے جھاڑن موڈھے:
''گیری دا بچہ اے
نہیں لالی اے''
آسو چاتوس
چِڑیاں لئی پرات پانی دی پئی ہوئی اے
چُنج وِچ کیتی سُو
لالی گُھٹ بھریا اے
سر بُھواں کے تکیائے دوالے
آسو چا پتلیری ٹہنی تے ول دی بہائی اے
''بِلی اِتھاں نہیں چڑھن لگی''
اندر آ بیٹھاں
جھٹ مگروں سونُو کالجوں پرتی اے
''آ ویکھ نا ذرا اوہ لالی''
نال لے گیاں سونُو نُوں
اوسے ٹہنی تے دو ہتھ اُپر ہوئی بیٹھی اے لالی
''توں بدلی اے تھاں ایہدی؟''
پچُھیم آسو نوں
''نہیں آپے بدل لئی سو''
سونُو دوائی پھٹ دی لیا لائی سو لالی نُوں
سِر مٹکایوس
روڑا وجائے؟
نہیں کانواں ٹُھنگی جاپدی اے
کاں چوگ ویلے غیر قوم نوں وِچ نہیں آون دیندے،
اندر آ گئے آں
پنج ست مِنٹاں مگروں سونُو مُڑنِکلی اے
میں تے آسو نال آں
''ہؤ کِتھے گئی اے''
سونُو آسو گھا بُوٹیاں پھولریاں نیں
''کوئی نہیں''
''بِلی لے گئی اے؟''
''کوئی کھمب تے ہوندا بھُنجے''
''اُڈ گئی
آہو اُڈ گئی اے''
سانجھی تسَلّا بولی اے اساں ترونہہ اندروں