'نہ
اگے کدِیں نہیں اساں سُنی سرسوت ہزاری دی
اج ای سُنیائی ناں بھاء شپیئا'
تھاں وی سُن لؤ،
اوہو تہاڈا عَیش کَیش محلہ بُرجُو
اوتھے پُجِیندی آہی اوہ سرسوت ہزاری
پِچھلی صدی دی گل جے،
کیہ بائیاں کیہ نتھ کُھلہائیاں
ہر کوئی آونی دھرنی اگے لائی لہائی اپنی
ڈھیر جدوں لگ جانے
آکھنا اوہنے:
تَکی جے پَت سَتیا اساڈی سرس وتی؟
کیہ کر کڈِھیو نیں آہر بزار لئی،
جاؤ
دے آؤ
اَیرا وتی ساڈی پِیر بَھین نُوں،
بوڑے انت ایہناں دا
تت اساڈا موڑے اساں نوں،
اساں ویہار بزارا ڈھائیے
آپ ہو مُڑ جگ آئیے،
'ناں ایہہ کیہ ہویا سرسوت ہزاری بھاء شپیئا'
ناں تے اوہدا ماپیاں منظر خانم رکھیا سی
وڈی ہوئی تے آپ وٹا سرسوت اوہنے کِیتا
سُنیائے وید کِسے وِچ آئی اے سرسوتی
برہم دی گھر والی،
قدرت دی رکھوالی آکھ لؤ،
اوہ دیوی گیان دی
کلا دی
نالے بولی دی اے،
آہی نَیں وی ایسے ناں دی سَت دری
پانی اوہدا سجرے کریندائے سار
ترووراں دے
جِبھ دھرتی دی وتریندائے،
لؤ جی
آئے آری
جیہڑے توں دسنائیں بُرجُو تیرے وڈیرے سن
ست دریائی جُوہ وِچ لتھے
سرسوتی اوہناں سِیما کر کے رکھ لئی،
بَوڈر آکھ لؤ،
سرسوتی نے ٹُبھی ریت وِچ لائی
الوپ ہوئی،
تھاوں تھائیں اَنگل باہر کر سوم چِھنکدی
تردی ہیٹھو ہیٹھ ریت دے
کِتے دی کِتے گئی،
سُتے سجن سمندر دے گل پائیاں باہِیں
اپنی جاگ اوہدا سُپن تھئی
تے سُپن اوہدا جاگ اپنی،
لؤ جی، تھاں تھاں ہوئی چڑھائی
پھڑ لؤ جیہڑی وی دِسے
رگڑ تَفتِیشو،
جاندیاں نہیں اساں کون ہاں
غوری تُغلق سَیدّ مُغل برہمن جرمن
پُرتگیز انگریز چنگیز کُشتری،
'گل سرسوت ہزاری دی بھاء شپیئا وِچے ای رہ گئی'
آہو،
وِچے او خِلجی کلیجی کالجے تیرے دے
ٹوہی آ نالو نال،
لؤ جی
ناں سرسوت ہزاری
نچیار نہ اوہدے نالدی کوئی ہوئی
واج بُلیل دی بُلبل
فارسی پڑھیاں تیریاں وڈیاں بُرجُو
اوہنوں ہزاری کیتا،
لکھاں کمائے چودھریاں دے پلّے پُھلائے،
پُتر دو ہوئے
چودھریاں وِچ اوہ وی بہائے،
انت کیہ ورتی اندر اوہدے اوہا جانے
بھری جوانی وِچ ای سبھ کُجھ تج بیٹھی،
تُرت بائیاں سبھ مُرشد کیتی،
لؤ جی
عَیش محلے کَیش تُھڑن تے آیا،
وڈیاں چودھریاں
سنے سرسوت دیاں پُتراں دے
انت ایہہ متا پکایا:
ایہہ روگن ہوئی روگ اساڈا
اُپاء تے کرنا ای پَینائے
ڈاکٹر گھلنے آں
دونہہ مِنٹاں وِچ روگ نبیڑے
کار اساڈا ہو نرویا ہَلّے،
چَونک وِچ نال کُھوہی دے ایہدا مزار اُسارنے آں
پُت دوئے خنگاہ متوَلّی ہوسن،
لؤ جی
سُونہہ اِک بائی رام جوائی نوں لگی
آ اوہنے سرسوت نوں دسّی،
کیہڑی ریت وِچ ٹُبھی مُڑ سرسوت لائی
کِتھے الوپ ہوئی
کِسے نوں سار نہیں،
ایہو سُندے آئے آں
ہُن تھاوں تھائیں سوم چِھنکدی
نال سمندر اِک مِک ہے،
ورھ پَیندی اے رُت برُتّے
ویلے کویلے خلقت دے کَر پَیرِیں
درشن دان پُنگردا ہے