چِٹیاں مُچھاں پتلا لاکھا
مچھی لَین میں جدوں لوہاری جاناں اوہنے کول بہاونا
‘‘ماما تیرا تدوں نوکر امبرسر سی
اپر کمرہ اوہدا تھلے ہٹی ساڈی
نانک دے دربار نوں راہ وی چونک فریدوں جاندا ہا
سلما ستارا کردے ساں
مندا پیائے نا دُوجی لاموں پہلاں
اُستاد آکھیائے مچھی لاء ہُن
اوہدی دسّی تلی سوَلّی گاہک نہیں گَنّی چھڈی’’
کئیں واریں ہونا
یاراں نال میں گیاں کڑاہیاں مُودھیاں پئیاں نیں اگے
بیٹھائے اونویں
چِٹیاں مُچھاں مُونہہ تماکُو نال ہلدِیاں ہولی ہولی
سِر مار کے آہندائے ‘‘گئی’’
اِک واریں گئے اسیں
کول بُلایوس مینوں
‘‘کَن اُرانہہ کریں نا
مچھی نصیباں نال
تَل عُمر کڑاہیوں کڈھی
چکھنی نہیوں بنی’’