[ترَے1 جی چِٹ کالِیاں 2 داڑھیاں والے
دریا دے کنڈھے پئے ٹہلدے نیں ]
اِک:سانُوں مُلّاں مُلاں کر کے ایہناں گل ساڈی نُوں بے ست3 کرن دا حِیلہ لوکاں دے ہتھ پھڑا دِتا اے
دُوجا:داڑھی مُنیاں شاعراں دی گل دا لوکِیں چوکھا4 آدر5 کریندے نیں اجکل
تریجا:اگے وی اِنجے ای ہا یار……
داڑھیاں والیاں شاعراں وی کوئی ساڈے قصیدے6 تے نہیں نا لِکھے…… لؤ سُنو ایہہ
(فون تے کافی خواجہ غلام فرید دی لا کے سُنائِیوس)
الف ہِکو7 ہِم8 بس9 وے10 مِیاں جی11
1- ترے: تِن (3)- 2- چِٹ کالیاں: کُجھ وال چِٹے کُجھ کالے- 3- بے ست: 1) بے ستیا، بے طاقت، بے اثر، 2) کُوڑ- 4- چوکھا: بہت زیادہ- 5- آدر: عزت، قدر- 6- قصیدے: تعریف دی شاعری-
7- ہِکو: اِکو، اِک ای- 8- ہم: سانُوں – 9- بس: کافی- -10 وے: اَے (اوئے)-
11- میاں جی: اُستاد نُوں عزت نال بلاون دا ڈھب-
ہور کہانی مُول1 نہ بھانی2
الف گیئم3 دِل کَھس4 وے مِیاں جی
بے تے دی پئی کَل5 نہ کائی
الف کِیتم بے وس وے مِیاں جی
ٹھپ رکھ فِقہ6 اصول دے مَسلے
باب7 بِرھوں 8 دا ڈَس9 وے مِیاں جی
جے نہ سبق بِرھوں دا ڈِتڑو10
اج کل ویساں 11 نَس12 وے مِیاں جی
بِرھوں سِکھیں تے بِرھوں سِکھائیں
ہئی شابس13 شابس وے مِیاں جی
جِیندیں موئیں 14 ہِک15 یار دے16 رہسوں 17
وِسری18 ہور ہوس19 وے مِیاں جی
منتر20 پرِیت دا پھُوک شُکاریں 21
لِنگڑِیں 22 ہِم آلس23 وے مِیاں جی
1- مُول: اُکا، بالکل- 2- بھانی: پسند آونی- 3- گیئم: گیا اے- 4- کَھس: کھوہ-
5- کَل: خبر، (معنے)- 6- فِقہ: شریعت دا عِلم- 7- باب: چَیپٹر، حِصہ- 8- برھوں: عشق وِچ وِچھوڑا-
9- ڈس: دس، سمجھا- 10- ڈِتڑو: توں دِتا- 11- ویساں: جاساں - 12- نس: دَوڑ-
13- شابس: شاباش- 14- جیندئیں موئیں: زندہ وی تے مر کے وی- 15- ہِک: اِک-
16- دے: کول- 17- رہسوں: رہاں گِیاں اسِیں - 18- وِسری: بھُل گئی- 19- ہوس: خواہش-
20- منتر: دم کرن ویلے جیہڑے لفظ پڑھے جاندے نیں – 21- پھُوک شکاریں: پھُوک مار کے دم کریں - 22- لِنگڑیں: لِنگاں وِچ، عضواں وِچ- 23- آلس: سُستی، کمزوری-
اُلفت1 زَر2 دی گھر دی وَر3 دی
نہ رہ گئی ہِک خس4 وے مِیاں جی
رانجھن میرا میں رانجھن دی
کھیڑئیں 5 دے مونہہ بھس6 وے مِیاں جی
سٹ7 گھر بار تے بار8 وسیساں 9
بدلِیں 10 کیتی لَس11 وے مِیاں جی
علم عمل ویسی جے کر
عِشق پیو12 کن رس13 وے مِیاں جی
اوڑک14 عِشق اندر جِند15 ڈیسوں 16
نہ سمجِھیں کِھل ہَس17 وے مِیاں جی
نینہہ18 کدوکنا19 پیوسے20 پُکھڑے21
نہ ہئی قلم تے مَس22 وے مِیاں جی
نہ اج کل دی یار دے ول23 دی
1- اُلفت: محبت- 2- زر: سونا، دولت- 3- وَر: بَر، خاوند- 4- خس: تِیلا- 5- کھیڑئیں: کھیڑیاں دے (ہیر دے ساہوریاں دے)- 6- بھَس: سواہ، راکھ- 7- سٹ: سٹ کے، پرے کر کے-
8- بار: جنگل- 9- وسیساں: 1) وساواں گی، 2) وساں گی، رہاں گی، آباد کراں گی-
10- بدلِیں: بدلاں نے- 11- لَس: چمک (بدل جُڑن تے لِشکار آوندی اے)- 12- پیو: پیا-
13- کن رس: کن وِچ رس- 14- اوڑک: اخیر- 15- جِند: جان- 16- ڈیسُوں: دیواں گِیاں -
17- کِھل ہس: ہاسے مخول دی گل- 18- نینہہ: عشق- 19- کدوکنا/کدوکڑاں: کدوں دا-
20- پیوسے: پیا ساڈے- 21- پُکھڑے: نصیب، قسمت، بھاگ (پوکھ)-
22- مَس: سیاہی (لِکھن واسطے)- 23- ول: طرف-
روز ازَل1 دی نہس وے مِیاں جی
گھول گھتاں 2 میں یار دے ناں توں
بال بچے اَس کَس3 وے مِیاں جی
عِشقوں مُول4 فرید نہ پِھرسُوں
روز نوِیں ہِم5 چَس6 وے مِیاں جی
اِک:ایہناں شاعراں ای سُرت ساری اُساری اے عاماں لوکاں دی
دُوجا:آہو یار،
ساڈے مگر تے اوہ گوڈے ٹیک کے متھے رگڑ کے فرض ای پورا کردے نیں اپنے ولوں
تیجا:اُتوں تے بہہ کے پُوری سُندے جاپدے نیں ساڈی، اندر خبرے کیہڑے اُلیل بھوانٹِیاں ماردے نیں
اِک:دِل کردائے یار اسیں وی رَل گنوئیے
دُوجا:آؤ وت،
انگاں دے سدیندے آئے آں ہوراں نُوں، اج ہوراں مگر لگ اپنا آپ سُنجانن دا ویلا آیا لگدائے
تیجا:ہور وی اپنے ای نیں، آ جاؤ……
اِک:الف ہکو ہِم
دُوجا:الف ہکو ہم
تریوے:بس وے میاں جی……
(تریوے قوالی کریندے حال کھیڈیندے نیں)
1- روز ازَل: پہلے دِن جدوں سرجنا ہوئی انسان دی- 2- گھول گھتاں: قربان کر دیاں -
3- اَس کَس: اسیں تے ہور، سبھ- 4- مُول: اُکّا- 5- ہم: مینوں ہے- 6- چَس: مزا، سواد-