نِکا شہر اے ساڈا
سکول تے آہے ای
کالج وی کُھل گئے نیں
نویں پڑھے لِکھے ترقی پسندی سُندے گِندے
کمیونسٹ وی ہوون لگ پئے نیں
بھولے کُجھ وِچوں ٹوہندے نیں سانُوں وی
اپنی ڈھانی نال رلاون کیتے
آہنے آں بَلّی ویکھو کرنے آں گل سیانیاں نال
تے دَسنے آں،
اِک دِن راہ وِچ مُفتی لِیر لنگوٹ نُوں ویکھ کے
ہاسے بھانے اوہنوں گل سُنائی
دسّو نا مُفتیئ اعظم
کیتی اپنی سٹ کِتھائیں کوئی آئے
پِچھے بدھی کُرسی جَدّی کیویں لہائے،
مار کھنگُورا آہندا اے
وِرد وظیفے ڈھیر نیں چودھری
پر اُلٹ پُلٹ کوئی گھول پِیو تے مُدا میرے تے پا جاؤ
ڈُبکی لا کے ترن والیاں جائیں وی بہوں چنائیں نیں
پر ڈُب مرو تے پُلساں میرے مگر لوا جاؤ،
کیہ کرئیے مُڑ مُفتی؟
کُجھ نہیں
کُرسی پِچھوں کِھچ کے اگے دھرا لؤ
کُکڑ پِھردا اے باہر جیہڑا
پھڑ کے اوہنوں اُپر بہا لؤ
وِٹھ کرے بھاویں بانگ دیوے
کم تہاڈا ہویا کہ ہویا سمجھو