''واہ اوئے، شونکی بُرجُو میروُ بھنبیروُ
بلّے، شریفہ بَوٹِنی والا نال لیائے او،
مَلّی بیٹھے او تھڑا، میں جاواں؟''
''بھاء، چِراں دے اسیں اُڈیکنے آں پئے''
''کیوں، لنگھدے مستی بھور آئے او ویڑھے کِسے دے؟''
''ایڈی سستی وی نہیں مستی ساڈی بھاء جی''
''آہو،
سانبھ چھڈو دس باراں ورھے،
ہو جاوے جاں ست سو گُنی،
مُڑ تول ویچیو چونڈی چونڈی کر خرمستی''
''سُن لیا ای شریفے،
کاہلا پیا ہویا سیں تُوں،
دس بارھاں ورھے اُڈیک، شرافت ایہو ای او،''
''ایہہ کالھ شریف کاہدی ہئی تینوں؟ باہروں ہریا اندروں بھریا،''
''میئیں گنڈوئے ول جانا اے بھاء نال تہاڈے''
''واہ بھئی
پُٹھا کر چھڈیا ای مِیئیں ہوراں نُوں
دساں باراں ورھیاں نُوں چُٹکی کر گیا ایں''
''کیوں بھاء''
''اوسے گھروں ای تے آونا پیاں میں،''
''سدیا سی اوہناں تُہانوں؟''
''کیون، بَوٹنی مینوں پڑھاؤنی ہا نیں؟
نہیں، میں آپ گیاں،
تُہاڈی جماتن بِینی پِھینی اے نا،
مورت واہی سو لالی دی،
چِترکار ہوئی،
دِتیوس مینوں
وکھاواں مِیئیں گنڈوئے نُوں، ٹھیک اے''
''کِتھے جے اوہ مُورت؟''
''تک برساتی، رکھ لئی
’گھل بِینی نُوں میرے کول
میں لالی وکھاواں اوہنوں‘
’پہلاں مینوں تے وکھاؤ نا ماسی‘
چمکی اے برساتی
ویہہ، نہیں، پندراں ای منٹ لائے نیں سمجھو،
ویڑھے دے وِچکار کھلہار مینوں جُھمری اے
پونے گھنٹے وِچ ای گاون مُکا گئی جے''
''سُننا اے اساں وی''
''بیٹھو نا گھنٹہ پَونا''
''باراں ورھے بہاؤ بھاء شپیا
اساں تے سُن کے ای جانا جے''
''’اُڈ سمجھوتی تینوں کرینی آں پئی شپچُو میں لالی،
نِری بدامن نہیوں میں،
چٹ کال رلائی لال اُڈاری میری او،
سُوہے دی سُوہ نہیوں پئی لگدی،
کیوں، ناں میرے وِچ ناہیں؟
تَیں شپچن ہیں پر ہیں ناہیں؟
ہے ایہہ گل کوئی سوچن دی؟
لال ترِیج ہوئی اساں دوہاں دی
باہیں کھمب کر مان نا لالن
لہے لوئی لوچن دی''
“بھاء اساں وی نچ گاونا جے''
''اُڈیکو سائیں رکّھے نُوں''
''دس باراں ورھے؟''
''اونے وِچ تُسیں آپ ای سائیں ہو نچاسو
ساڈے جیہیاں نُوں لا مگرے''