فرید بھنڈار

''ویکھو پولو گراؤنڈ وِچ الاں بیٹھیاں ہوئیاں جے

اکو تھاں نہیں پوری گراؤنڈ وِچ کھلر کے''

''اج میچ تے کوئی نہیں''

''اِلاں گھوڑیاں دا کوئی ساک تے ہونائے''

''جیویں پارکیاں دا کاواں نال اے؟''

''اِلاں وچارِیاں آہلنیاں وِچ ہون گیاں 

ایہہ اِلڑ نیں''

''ایہہ شاہین نیں بابیو پھڑے نہ جانا''

''بُھکھیاں نیں''

''اِل تے ماس ای کھاندی اے اوہ وی مویا''

''گھوڑے گھاہ کھاندے نیں''

''گھوڑیاں والے گھاہ نہیں کھاندے''

''پارک تے سمجھو واڑ اے اصل گراؤنڈاں ای نیں پولو''

''واڑ ای اے تے وڑ گئے او نا دو روپئے دے کے''

''آہو واڑ چ وڑ ای ہو ہور''

''پولو مہنگی کھیڈ ہوئی جی

''اگے سُنیائے ایہہ چوگان اکھویندی آہی

کھیڈن والے وزیر شہزادے آہے''

''قطب الدین وی ایبک سُنیائے درہ خیبر لنگھیائے پولو کھیڈدا

انار کلی وِچ گول ہویائے تے مویائے''

''اجکل تے جرنیل ای کوئی کھیڈے تے کھیڈے

یا کوئی قبضہ گیر وڈیرا پَڑی آڑھتی''

''اساں تے بھائیا ٹانگے وِچ ای گھوڑ سواری کیتی جیہڑی کیتی''

''اوہ وی سالم کدیں نہیں''

''کھیڈ ہور کیہڑی ہن سستی بابیو رہ گئی اے

کرکٹ بیٹ یاں ٹینس بال تے چھڈو ہاکی کون ہماتڑ لے سکدائے

لوے تے کتھے کھیڈے کیہڑے ویلے کھیڈے''

''دفتروں آن کے نان چھولے نہ لاوے تے آٹا کتھوں آوے''

''دن دفتر تے راتیں چوکیدارا بھائیا

چھولے نان نصیباں والے لاوندے نیں''

''کھیڈ تے ہن سِر دھڑ دی بازی اے لالہ''

''سکول نہ جاؤ سیزن لاؤ کروڑ کماؤ''

''بنو مشہوری1 کوٹھی پاؤ''

''سکول کیہ کرنائے ایم اے کرو کلرک نہیں کوئی رکھدا''

''ایم اے کولوں چٹھی پڑھی نہیں جاندی کلرکی سوکھی اے کرنی؟''

''کرنی نالے افسر نوں کروانی''

''غریباں لئی امیر ہون دے بوہے ہمیشہ ای کھلے رہے نیں''

''بوہے اندر کندھ ہوندی اے شیشے دی

ٹکر وجے سِر پاٹے تاں دِسدی اے''

''اگے گورے کھیڈدے سن جمکھانے

دیسی ایویں لیسی لاون تے آہے''

''لیسی لاون لئی وی گٹ مٹ سکھنی پیندی سی''

''اوس ویلے تے گل ای ساری گِٹ مِٹ دی سی بابیو''

جیہنوں نہ آونی اوہنے رومی ٹوپی پا لینی

تے جلسیاں وِچ جا پُھمن بھڑکاؤنا''

''ویلے ویلے دی گل اے بھائیا

ہُن گٹ مٹ والا گرین کارڈ تے ٹیکسی واہوندائے

تے رومی والا بمب بنھ کے پِچھے بہہ جاندائے''

دیسیاں وچوں اکو نَر ہویائے پٹیالے آلا

وائسرائے دی سالی کڈھ کے لے گیا''

''ہونا کیہ سی

مہینہ شملے مال روڈ تے آونا بند رہیا''

''سالی دی کڈھوائی ہونی نیں آپے''

''بھیت سیاست دے''

''سالی سیاست دیور سیاست جیہڑی چل جائے''

''ہن تائیں تصویراں اوہدیاں لگیاں نیں جمکھانے

پیڈ بنھ کے بیٹھائے گورے آل دوالے''

''منٹو پارک کھیڈدے نہیں سن دیسی؟''

''اِک بَلے نال دس دس''

''جمکھانے وِچ بیئر دوپہرے چلنی

اوتھے شربت شکر پیسہ پیسہ پا کے''

''پر چِٹی پینٹ جس پا گراونڈے وڑ جانا

اوہنے اوس ویلے تاں سمجھو گُھٹ لا لینا گوری بوتل دا''

''ہاکی وِچ وی ادھ گورے ای آہے پُلس سارجنٹ''

''ہاکی کھیڈ وی ادھ گوری جیہی آہی

جیویں نِکر ادھ پتلون اے''

''جیویں پُلس ادھ فوج اے''

''دیسی کھیڈ تے کوڈی آہی''

''کوڈی دا وی مُل ہوندا سی اودوں''

''کمال تے بھاؤ پیسے نال ای ہویائے ہمیشاں 

گاون ہووے پلوانی ہووے

ساہمنے پلوان مراسی ہونے پچھے سیٹھ یاں راجے''

''آہو من بدام تے بکرا کِتھوں روز دا آوندا''

''کمال تے پِچھوں بنیائے

اگے کھیڈاں کھیڈاں ای آہیاں''

''کمال جمال اے پیسے دا''

''اوئے صدقے جاواں''

''ہُن تے کھیڈ شکار اے''

''شکار تے ڈنگ دا آہر سی، بُھکھ لگنی تے کرنا''

پلوان تے سُنیائے فوجاں وِچ ای ہوندے آہے اگے

باتشاہاں نے پِچھے رہنا

پلواناں پڑ وِچ لہنا

''ڈھڈ وڈئے کہ گُرز بئی بولو''

''سمجھو سو فوجی نہ رکھے اِک پلوان رکھ لیا

پھیر توپاں آ گئیاں تے رُستم کھاڑیاں وِچ خلیفے لگ گئے''

''چکر پُورا ہو گیائے لالہ چلیئے''

''اسیں تے ہور اِک لاونائے''

''آہو دو روپیے پُورے کر کے ای آیو

بھاویں آپ وی پُورے ہو جاؤ وِچے ای''

1- مشہوری: اشتہار