فرید بھنڈار

فریدا شکر کھنڈ نوات گُڑ، ماکھیوں ماجھا دُدھ

سبھے وستوں مِٹھیاں، رب نہ پُجن تُدھ

فریدا ساریاں مِٹھیاں وستوں دا ورتن تے دان کرن تیرا رب نُوں پُجن نہیں -

مِٹھا مہنگا گنیا ویندا اے- سُکھالے گھراں والے ای ماندے نیں حلویاں کِھیراں مِٹھیائیاں شربتاں نُوں - تے مِٹھا ونڈ کے اپنے سُکھال دا وکھالا وی کریندے نیں - کِسے دی سُکھال دسنی ہووے تے عام ایہو آکھیا ویندا اے، مِٹھا کھاندا اے-

فرید ایس دوہڑے وچ مال واناں نال گل پئے کریندے نیں - گِنیاں مِٹھیاں تھوکاں نُوں وستوں آکھیانیں -

وست لفظ مُل مِلدیاں بزاری چیزاں لئی ورتیا ویندا اے- فرید دسیندے نیں مل وان ویہار بندے نُوں اپنے تت کنوں تے قُدرت کنوں پروکھے ای رکھدا اے، کیونجو مل مالکی کرنہاراں نال دھرو دھگان باجھوں تے بن ای سکدی، نہ ای پسر سکدی اے- ایہدی ساری رہریت، ایہدے ٹھوکے دِین دھرم تے چج چالے کرنہاراں نُوں اوہناں نال ہوئی کنوں اسُدھ رکھن دے ڈھنگ نیں -