]دُراڈے پِنڈوں پرے پروکھے اِک چھپڑی- کنڈھے کھلوتی اِک جنی پانی نُوں ٹوہ ٹوہ پئی ویہندی اے]
بسنتی: ]دُوروں] نِیلو…… نِیلو……
نیلو: کون؟
بسنتی: ]کول آ کے] میں، ہور کون
نیلو: آہ، بسنتی، سچ پئی آہنی ایں، ہور کون پچھانے ہُن مینوں
بسنتی: پر تُوں ایتھے کرینی کیہ پئی ایں، کھلوتی کلم کلّی
نیلو: لبھنی آں پئی
بسنتی: کیہنوں
نیلو: جیہڑی گواچ گئی اے
بسنتی: کیہڑی
نیلو: نیلو
بسنتی: ]ہسی اے] کیہڑے پِیر دی بیت ہوئی ایں صُوفنے، ایہہ کون ایں ساہویں مینڈے جے نیلو نہیں تے
نیلو: بس ناں ای او- آپ کوئی نہیں
بسنتی: ایہہ اکھیاں نِیلیاں، ایہہ کر پیر، ایہہ انگ ملُوکڑے کیہدے نیں جے تینڈے نہیں تاں
نیلو: ایہہ اکھیاں ایہہ کر پیر ایہہ انگ لبھدے نی پئے اپنا آپ
بسنتی: ایس چھپڑی وِچوں؟
نیلو: پھول آئی آں سبھ سمندر نیئیں نالے چشمے سرچشمے
بسنتی: لا لے ڈیرا ہُن ایتھے ای
]نچ کے] سَے برسیں، سَے برسیں نی کھٹن گئی
تے کھٹ کے لیاندی سرگھی
سُلفے دی لاٹ ورگی
جٹی چھپڑی چوں نھا کے نِکلی
سُلفے دی لاٹ ورگی
نیلو: بس ہُن تینوں ای پیوسی لوک
بسنتی: مینوں؟
نیلو: آہو، سُلفے دئیے لاٹے
بسنتی: تے جیہڑے ویلے سڑسی نا اندر تاں ڈھونڈیندے وتسن تینوں:
’ہائے نی نیلو رُڑھ جانِیئے، چِھٹ تے پا جا مُونہاں ساڈیاں وِچ‘
نیلو: لَے، اوہ کون پئی آوندی او، چِھٹ منگی او نا، ہُن لمبو چُوپ
]اِک جنی رتّے بانے وِچ آئی اے]
بسنتی: آؤ لالی، سرکار عالی
لالی: بسنتو رانی، کلیاں تے پت مینڈی لاہ ای لینی ایں، جِتنی لہندی اے، ہوراں ساہویں تے کوئی اوہلا رکھ لیا کر
بسنتی: کون ہور اے ایتھے لالی
لالی: آہو ہور تے کوئی نہیں، ایہدے ہوندیاں ہو کون سکدا اے ہور
بسنتی: کیہدے ہوندیاں
لالی: نِیلو دے
بسنتی: اوہ تے آہندی اے میں ہے ای نہیں
لالی: اوہ نیل اے- سارا ورھا وگدی اے دینہہ پر رات- نہ اکدی اے نہ تھکدی اے- پتہ سُو نا جیون ایہدے سِر تے ہے- وگن چھڈ دیوے تے ساہ سُک ونجن گھاہ بُوٹ پکھو جناور دے، سنے مانس جُون دے
بسنتی: کیوں نیلو
نیلو: کیہ دساں تے کیویں - ہوواں تے دساں
لالی: کتھائیں ہیں نیلو
نیلو: ایہو تے لبھینی آں پئی
لالی: تے ایہہ جیہڑی گل پئی کریندی اے ساڈے نال ایہہ کون اے
نیلو: ایہہ بھال اے اوہدی، گواچے تت ست دی
لالی: نیلو تینڈیاں گلاں نے مینوں وی شک وِچ پا دِتا اے- ہاں میں وی کہ کوئی نہ، ہاں تے کون آں
بسنتی: تُوں تے بہار ہوئیوں لالو
لالی: بہار تے تُوں ایں بسنتِیئے- میں تے بھار آں تینڈے سِر تے- جیہنوں تُوں لاہون دا آہر پئی کرینی ایں نِت- ہاڑ دا ساڑ آننی آں میں، تُوں اوہدے وِچ وی درس وکھالنی ایں اپنا تے واء نُوں گاون گوینی ایں ]نچ کے]
مینڈا رنگ دے بسنتی چولا
مینڈا رنگ دے
بسنتی: بھلا ہووی- ویلے سِر چیتا کرایا ای واء دا سدئیے نہ پَونم نُوں؟ ساڈے سہنسے مُکاوے، تینوں مچاون والی تے نِیلو نُوں وساون والی جو اوہا ای ہوئی
لالی: آ نِیلو
]تریوے رل کے ہولی لَے وِچ نچ گاوندیاں نیں]
آ پَونم،
سِکدیاں انگاں نُوں ہُل چُھہا
سُکے پئے نی ساہ پونم
]دُوروں اِک پتلی لمّی جوان جنی ہولی ہولی ٹُردی، رُکدی، تھک بہندی، مُڑ اوکھی اُٹھدی آوندی اے، ساہ چڑھیا ہویاس، آ کے سِر پھڑ بہہ گئی اے]
بسنتی: کیہ بنیاں پونم، خیر ای؟
پونم: تہاڈا سد سُنیا اے تاں دسن آئی آں ……
لالی: کیہ
پونم: اوہ ہُن ہے کوئی نہیں
بسنتی: کون
پونم: جیہنوں سدیندیاں ہو پئیاں
لالی: تے تُوں؟
پونم: میں اوہدا نہ ہوون
بسنتی: پوند نیلو سُنائی اے اپنی ہوند گواچن دی، ساڈی رت سُکائی اے، ہُن تُوں وی اوہا کہانی چھوہ بیٹھی ایں
پونم: ایہہ کہانی ورت گئی او بسنتو، مینوں پتہ اے نیلو دی پِیڑ دا، میں ایہدی سار لین جوگی وی کوئی نہ آہی
لالی: تینڈا چلن تے اُڈن ہویا پونم
پونم: اُٹھن جوگی ہوواں تے اُڈاں
لالی: پُواڑا ایہہ بنیا کیویں
پونم: دس نِیلو، مینڈے کول تے ساہ نہیوں اینے جوگا
نیلو: تُوں آویں پونم، میں لالی نُوں چُم تینڈے کندھاڑے چڑھ بدلی بناں، انبراں تے سراں، تینڈے اندر رچ رس بھوئیں تے ورھاں - پونم تُوں میں دوئے اِک ہو جِیونیاں - ایہناں بندیاں دے لاہے نے پھاہے لائیاں - ہر پل چَھٹّے دُھوں دے، مارو ماری، مارو ماری، مینڈا ست نہیں، تینڈا ساہ نہیں
لالی: پونم دا ساہ نہ ہووے تاں میں کیویں بلنا ہلنا اے- دس نا بسنترو، تُوں وی دڑ پئی وٹنی ایں ہُن
بسنتی: میں تینڈے کنوں وکھ تے نہیں لالی- تینڈا دم نہ رہیا تے میں آوندے پھگن دیاں بُلاں نُوں جاندے مانگھ دیاں بُلاں نال چُھہا کیویں رنگنا اے- جاپدائے رنگ اساڈا اپنے انت نُوں پُجدا اے پیا
لالی: کالی پئی آوندی جے
بسنتی: اخیرلی رات پئی آندی اے سانُوں انت دی نِیندرے سوالن لئی……
]پَوند چھاں جیہی تھئی اے آل دوالے- چونہہ جنیاں دے مہاندرے وی کالکھ لہر دے اندر لہہ گئے نیں - اِک پکیری عمر دی جنی، پکّا گُوڑھا رنگ، کالا بانا اے کہ سریر اے اوہدا ننگ دھڑنگا، ایہہ جاچن وی اوکھا اے- چال اوہدی وِچ جان انوکھی جاپدی اے، جیویں اُڈدی تَردی پئی آوندی اے- آ چوہاں نُوں چُم گلوکڑی گھت مِلی اے]
کالی: نی کیہڑا نشہ کیتی بیٹھیاں ہو
نیلو: نہ ہوون دا
کالی: ایہہ نشہ تے کرنا ای پوندا اے پُن ہوون دا حال کھیڈن لئی- لالی لاکھی تھیندی اے پئی- بسنتی ایس ویلے پِیلو اے- نیلو کال ہوون تے آ گئی اے ہانن مینڈی- پونم دی دھوئیں دی بُکل وِچوں ایہدے بے رنگے ننگ دا چور پیا جھاتدا اے
نیلو: میں تاں ہُن تائیں ایہا سوچیندی آئی آں جو جدن تائیں ایہہ ملّ ماری دا ورتارا پیا گِڑدا اے میں وس ورھ نہیں سکدی، پانی پانی ای نہیں - مَلّ دی میل نے اوہدا تت ای وٹا چھوڑیا اے، ہُن وسے کیہ، مَلّ مَیل دا مِینہہ؟ پر کالی ایہہ تُوں کیتا کیہ اے آن کے ہُن- مینوں لگدا اے کنیاں مینڈیاں اُنگلاں دے پوٹے پئیاں ٹوہندیاں نیں
کالی: نیلو تُوں ٹھیک سوچیندی آئی ایں - مَل ماری دے ورتارے نے بندیکی سُرت دے سومے بند کر چھوڑے نیں - ودھ توں ودھ کھٹی ای مُول بن گیا اے جیون دا- ویکھن سُنن چھوہن چکھن سُنگھن مَلّ نال میل دا حیلہ وسیلہ بن گئے نیں - مٹی واء پانی اگ مترئے ساک ہو گئے نیں، گند دے ڈرم تے گٹَر- ایس ورتارے نُوں مُڈھوں پٹن بنا ہُن چارا نہیں، جے ایہو کارا اے ہُن ساڈا تاں سانُوں ایس ورتارے دے پوائے بانے لاہنے پوسن، تاں ای ساڈی سُرت دا بھانڈا اپنے آہر پورے کر سکدا اے، ساڈی ستیا پرت سکدی اے ساڈیاں انگاں وِچ، میں ایہا گل سانجھی کرن آئی آں -
بسنتی: کالو تینوں اوہ پیا دسیندا اے جو ساڈیاں اکھیاں ویکھن جوگیاں نہیں
کالی: تُساں جاگو نا اج مینڈے نال
بسنتی: اساں جاگنیاں - اساں تینڈے ہنیرے دی جاگ لوانی اے ایہناں اکھیاں نُوں - نِیلو تینوں تینڈا نیر سِیر پیا باہوڑدا اے- ہُن نیلو نِیرو تے پِیلو پِیرو، پیرو پریمن، عشق دی جائی ہِیر
]گاون لگ پئی اے، ساریاں رل گئیاں نیں]
آؤ مِلو سہیلیو رل مسلت کرئیے
بَھے سمُند اتھاہ ہے کہو کِس بِدھ ترئیے
پِیرو نام جہاج ہے گُر کھیوٹ میرا
پَون پریم چلاوسی پار ہوسی ڈیرا
پِیرو بندِئیے جاگ لے ہُن جاگن ویلا
ایسے جنم ملاوڑا پھر ہوءِ نہ میلا
پِیرو سائیں موجود ہے سو سبھنیں تھائیں
میں بِنا نہ اوس دے اوہ میں بِن ناہیں 1
کالی: جنگلاں نُوں لگیاں اگّاں
سمندر بَھکھ پئے نیں
ڈِھڈ توَے ہوئے
ٹِکی لاون لئی آٹا کوئی نہیں
پاون نُوں لِیڑا پاٹا کوئی نہیں
ننگ نہنگ اَس جنیاں کھنیاں
ٹھار بجُھاونا ڈھاونا اے
مَل ویہار دا اگن پہاڑ
سارِیاں: ]نچدیاں] نی سئیو ہُن سِپنے ای سِپنے نیں
سانجھ کرت دِیاں سُوئیاں اساں
جُگاں پُرانے اُچ جِھک دے پاڑ
نی سئیو ہُن سِپنے ای سِپنے نیں
1۔ پِیرو پریمن ]1839-1872] دا کلام-