جیہڑی سانجھ دی جُوہوں 1 نِکلے
پرت کے اوتھے آئے ای نہ
اپنی کیتی تے کدِیں پچھتائے وی نہ،
ٹِبیاں 2 تے چڑھ چڑھ دِتیاں بانگاں
ٹوئیاں وِچ ڈھٹھیاں نُوں
جمعرات دی ونڈی شِیرنی،
جُمعے نُوں مکیئوں آندے پانی دی چِھٹ رلا کے
ووضو کرا جماعت کرائی
خُطبے وِچ اسلام کُفر دا کر کے نتارا
پُلاء قورمہ حلوہ کھادا رج کے،
ہِندواں سِکھاں نال
ہر رنگ دے میل مِلاپ توں منع فرمایا،
چِتاریا3 گھڑی گھڑی
”صرف اور صرف“ مُسلماناں دِیاں ہٹیاں توں ای
سودا لَینا دِین دا فرض اے،
دو مہینے ٹھہر کے سن سنتالی آیا
1- جُوہ: علاقہ، ریجن، ایریا- 2- ٹِبے: اُچی جگہ- 3- چتاریا: یاد کرایا-