فرید بھنڈار

چھاواں بوڑھ دیاں 

کِدھر گئیاں 

جِدھر بوڑھ گئے،

ادھ جیٹھ میں شِکھر دوپہرے نکل ویکھناں 

کیہڑی سی اوہ تھاں 

دسیا سی دائی دِینو اکواری

بوڑھ اُتھائیں ہوندا ہا

نِکڑیاں وڈکیاں رل بہنا،

بھلا ویلا اوہ ہوسی،

ہُن اوہ تھاں نہیں مینوں چیتے

خبرے دُکاناں پے گئیاں نیں 

ٹُری گیاں 

سوچیں پیا

دُور رَڑے تے کون اے بیٹھی کلم کلی

سِر تے کپڑا وی کوئی نہیں،

اپڑ کول میں آکھناں 

''مائی جی چھاویں ہو بہو''

ویکھیا سو جھٹ سِر چا مینوں 

''میں ہاں چھاں 

آ تُوں بہہ جا''

''ہس آکھناں، تینڈا تے پرچھاواں وی کوئی نہیں''

''سو تُوں پرچھاویں ڈُھونڈن نکلیائیں''

''میں سُنیا ہا وڈیاں کنوں 

پِنڈ دے بوڑھ دا

اوہدا نشان وی نہیں ہُن چیتے کِتھے ہا

گھنی چھاں ہوندی ہئی دسدے نیں''

''وڈکے تینڈے تے بہندے آئے پرچھاویں 

کیہ جانن پرچھاویں چھاں کیہ ہوندی اے''

''چھاں کِتھے گئی''

''کِتے نہیں 

ہاں تینڈے ساہویں''

''اوتھوں کیوں نکل گئیوں''

''کڈھ چھڈیا مینوں وڈکیاں تینڈیاں 

گھر بند کیتی نیں اپنے ولوں،

بوڑھ ہیٹھ اوہناں چَودھر ڈاہی

ہو بیٹھے پرچھاویں اُپر، مالک ٹھیکے تارک،

کمی سیپی سَتھ اوہناں 

کر ستھر کمین وچھائی ہیٹھاں،

آہر وی تھئے پرچھاویں''

''توں گھر بند رہیوں''

نہیں 

میں گِڑدی آئی آپ چوالے

سِجھ دوالے

اُگیندی جمیندی آئی

رُکھ فصلاں تے پُتر دِھیاں''

''دھرتی ماں''

''نہیں،

نہ میں اوہ، نہ اوہ،

ہاں بے ناویں 

نہیں کوئی مینڈا کھسم پیو،

رلیا1 رلت دا میں 

ہو وینی آں سِجھ واء پانی

آپے بالن آپ گھیو''

''مینڈا سِر سجدے''

''نہ سِر پیا گھسا خواہ مخواہ''

''کیہ کراں دس تینڈے لئی''

''جو میں ہاں سو تُوں وی ہو''

1- رلیا= قسمت، بھاگ، ونڈ-