اوس رستیوں گھر میں نہیں ساں آوندا ہوندا
لما پیندا سی
پر آپنے راہ پرانے توں ہن سڑک پار نہیں کیتی جاندی
اینی ٹریفک اے
سو میں سوچیا اوس رستیوں آیا کرئیے
نکیاں سڑکاں گلیاں وِچدیں لنگھ لنگھا کے
اوسے رستے اوہ کوٹھی وی آوندی اے
نویں سفیدی والی
متھے اُتے وڈا وڈا انگریزی سیمٹ حرفاں اندر لکھیا
فقیر جان بیگم- اُنی سو پنجھی-
ایہہ کون آہی سن پنجھی وِچ جس آپنا ناں لکھوایا ایڈا وج وجا کے
پُتر کھسم پیو دا نہیں لکھوایا
سن پنجھی وچ عورت ذات آزاد سی اج نالوں
سنیائے تدوں اوہ بائیسکلاں تے وی چڑھ گئیاں سن مال روڈ تے
وِچ وِچ سکرٹ وی پاونا کئیاں
سن پینٹھ توں مگروں بی بی بائیسکل تے میں نہیں ڈٹھی
سکرٹ تے ایتھے میماں پاوندیاں ڈردیاں نیں
گھگھری تہمت ورگا ای ہوندائے
پر گھگری تے ہُن گگڑیاں نہیں جے پاوندیاں
تے تہمت کیوں کوئی پاوے
اگے بھاویں علما وی ایہا پاوندے آئے نیں
پر ہُن بے پڑد ای ہونائے کسے نے پا کے
ایہہ نچن گاون والی ہونی اے
سیٹھ نواب کسے نے دِتی ہونی اے کوٹھی
پر گاون نچن والیاں دے ناں بائی بیگم جان تے ہوندے آئے نیں
وِچ فقیر ایہہ کتھوں وڑ گیا
راؤ فقیر چند میاں فقیر محمد مرواں وِچ فقیر امیر وی بڑے ہوئے نیں
نچن گاون والیاں دے تے ناں جے پِچھوں سادے ہونے
بدل دیندے سن اگلے
رَکھی جیواں روشن گوہر بندیاں سن تے چڑھدیاں سن
ایہدا ناں وزیر جان ای ہونائے
مَنت کتے من بیٹھی ہونی اے، وٹ گیا
کھٹ کما وی بیٹھی ہونی اے اوس ویلے تائیں
ناں وٹاون نال بھلا کیہ لہہ گیا ہونائے
سگوں عزت بن گئی ہونی اے پچھلی عمرے
اوہ وی سُنیاں نیں
جیہناں بھر جوانی وِچ فقیری مَلی من دی موج وِچ آ کے
کھٹ وٹ جوڑیا ہتھیں لٹایا سارا
ایہہ اوہ ہوندی تے کوٹھی کیوں چھڈ جاندی ناواں متھے لکھا کے
ڈھلدی عمرے کسے فقیر نوں دِل دھر بیٹھی ہونی اے
دل کردا ہونائے ایہہ گل نشر ہووے سو متھے لکھا کے بہہ گئی
ہو سکدائے ایہہ اوہو سادی سمجھ ہووے جِس پاروں لوکیں
سنگ مر مر تے ناں لکھوا کے رکھ لیندے نیں مرن توں پہلاں
خبرے کون سی کرماں والی ایویں اٹا سٹا اے ساڈا
بُڈھیاں بارے اٹا سٹا وی ایہو جیہا ای ہونا ہویا
کیہ کرئیے میاں اَٹے، سٹے بنا بندہ رہ وی نہیں سکدا
گل عجیب تے ایہہ ہے ایہہ کوئی دفتر لگدائے کاروباری
سن پنجھی والے مالک تے نہیں بیٹھے ہونے اندر
ایہناں نوں سنگ نہیں آوندی ایس ناں کولوں؟
ہو سکدائے کوئی قدر دان ای ہووے پرانیاں چیزاں دا
لنگھدا اگے ہار میں جَھٹ کھلوتاں اوس دِن
پباں بھار وی ہویاں پورا متھا ویکھن کندھ اوہلیوں
اِک سائیکل والا اندر جاندا لتھ میرے ول آیائے
''اُلر کیہ پیا ویہنائیں''
''ناں پیا پڑھناں''
''کیہدا''
''اوہ جیہڑا متھے تے لکھیائے''
''کیہدے متھے تے؟ ناں تے نہیں اوہ''
''ناں اے نال تاریخ وی اے
ایہہ تاریخی گھر نیں پرانے
ایہہ تاریخ نیں ساڈی''
اگلے دن میں مڑ اوتھوں دی لنگھیاں
نویں سفیدی ہو گئی ہوئی اے ناں متھے تے کوئی نہیں
اوہو گھر اے؟ ایہہ کیہ ہویائے
ہویا ایہو ہونائے
نوکر اندر گیا تے اگوں ملک صاحب نے پچھیا ہونائے
''کِتھوں سِگٹ لین گیا سیں پِھیکے ادھا گھنٹہ ہو گیائے''
''رپھڑ بن چلیا سی باہر ملک صاحب
سرکاری بندہ اُلر اُلر پیا ویکھے
میں پُچھیا میرے گل پے گیا
اکھے کون ایس گھر وچ رہندائے
میں کہیا تینوں کیہ
اکھے ایہہ تاریخی گھر اے سن اُنی سو پنجھی دا
پتہ ای کون سی ناں جیہدا اُپر لکھیائے
اندر وڑُو سی مساں میں مگروں لاہیائے''
ملک صاحب نے جدوں دی کوٹھی لئی اے
ناں روز ای پڑھدے ہونے نیں
عجب سواد کوئی آوندا ہونائے دُراڈا
جیویں مُجرا سُندے ہوون روز فقیرو دا
آپ نواب آف امر کوٹ ہون
پِھیکے دی گل سُندیاں سار ای بے سوادی بن گئی ہونی اے
لگا ہونائے فقیر جان دے دند نقلی نیں غصے نال پئے ہلدے نیں
اکھاں اصلوں اوپریاں نیں کہندی اے:
''کوٹھی خالی کر
میرا ناں تاریخ وِچ آون لگائے
توں وِچ کون ایں''
اوسے شامیں بندے لوائے ناں کُھرچایا
نواں پلستر، ہویا نویں سفیدی ہوئی تاں راتیں سُتے ہونے نیں
میں ایس رستیوں نہ ای آوندا نہ ای اوہ گل کردا
ویکھن کیہ دا کیہ کر جاندا ئے
ویکھن والیاں نوں ایہہ کدیں خبر نہیں ہوندی
راتیں خاب میں ویہناں
نواب صاحب آف امر کوٹ کچہری لائی بیٹھے نیں
وِچوں اصلی ملک صاحب نیں اوہ
فقیرو مجرا کردی پئی اے
پِھیکا مینوں ہتھ کڑی لائی اندرلے کے آیائے
فقیرو مجرا چھڈ کے اُٹھی اے
''سرکار توں میری جان سو واری صدقے
ایہو بندہ اے جیہنے میرا ناں تاریخ وِچ آون نہیں دِتا
اُتوں میری سرکار دے عیش وِچ خلل وی پایائے
بندی دی ہُن ایہہ درخاست اے
ایسے جرم چ ایہدا ناں تاریخ وچ آئے ہمیشہ
ایہنوں ٹھنڈ وی تاہیوں پینی اے
ایہہ ناں لکھوان دا شوق ای چور بناوندائے وڈیاں وڈیاں نوں''
''منظور'' نواب صاحب امرکوٹ فرمایا
''دوجی سزا ایہنوں ایہہ ہے
ایہہ ہن ایس سڑک تے مڑ نہ آوے
اوسے رستے گھر جاوے جتھوں ایہدے کولوں سڑک پار نہیں ہوندی
دونویں سزاواں اِکو ویلے شروع ہوون ایہہ حکم اے ساڈا''