''تُوں ایہہ تے دس مینوں
دُنیا تے آئے کیوں ہاں''
''پُرانیاں گلاں،
اسیں وِیزا لوا کے آئے آں؟
جم پئے، آ گئے،''
''ایتھے کرنا کیہ اے''
''اوہو پُرانی،
جِیون سُکھالا جِیوُنائے ہور کیہ
بچے پال سنبھال سُکھالے کرنے نیں''
''بتھیرا کر لیا اے''
''اوہو، ہُن تے ویلا اے اگانہہ ودھن دا
کاروبار ودھا
ناں ناواں بنا
ست پُشتاں تینوں یاد کرن،
نال سکول کھول لئیں
پڑھن غریباں دے،
ہسپتال بنا دئیں
مُفت علاج کراون ماڑے،
اپنی نظر نال ویکھ نا دُنیا نُوں''
''نظر تے میری اپنی نہیوں''
''کیہدی اے''
''خبرے''
''جو ویکھنائیں تُوں نہیں ویکھدا؟''
''میں ای ویکھناں''
''تے پھیر''
''ویکھنی میری وڈیاں دی وی ہوئی
آل دوالے جو نیں اوہناں دی وی،
جو پڑھیائے جو سُنیائے اوہ وی وِچ اے
جِیویں سمجھیائے،
تے اوہ وی وِچ نیں جیہناں لِکھیائے دسیائے،
رکھن چھڈن دوئے رنگ نظر دے
دوئے ڈھنگ مَلّن دے نیں''
''ایہہ تیری نظر اے میری؟''
''سبھ دی ایہا اے''
''تے تیرا خیال اے ایہہ بدل وی سکدی اے''
''بدل جانی اے''
''کدوں''
''جدوں بدّل سِیر دا سارے جگت تے وسیا موہلے دھار''
''اوہ کیویں ہونا اے؟''
''تُوں میں ہوئیے پانی
تے چڑھیئے واء ہو کے
ہو مُڑ پانی ورھیئے''
سِیر= سانجھ، رلت-