فرید بھنڈار

''تایا سوہنُو

اج ہتھ تہاڈے وِچ ایہہ کیہ اے''

''کیہ گل ہوئی او اکھیاں نوں

دِسیا نہیں اجے جمن لا دا ویہندا آیائیں؟''

''اِک گل کراں میں تایا''

''ست کر گاچھی ٹبّر یبڑی

ہتھ بٹیرا اے میرے تیری جِیبھ تے نہیں''

''انھے ہتھ بٹیرا سُندے آئے آں

تُسیں سُجاکھے کیوں ہو''

''جیہڑے سجاکھ دی عینک توں لائی پِھرنائیں گاچھی

اوہ میرا اَنّھ ای

ٹھیک آکھنائیں

انھیاں بھانے سُجاکھے انھے ای ہوندے نیں

تینوں کُجھ دِسدا ای نہیں

کیویں وکھاواں تینوں ایہہ کیہ اے''

''بٹیرا نہیں؟''

''نہیں''

''دسو تایا پھیر''

''ہاتھی او''

''کیویں''

''پِڑ وِچ لہہ نہ ساہویں ایہدے

سُنڈ دند گِڑ رِڑکن ڈِھڈ تیرا

تاں مکھن کر اپنا آپا ایہنوں چٹاویں،

صدیاں ہوئیاں نی

ہست لڑاون ہستی او ساڈی''

''اکبر بادشاہ ویلے دیاں میں تکیاں نیں تصویراں''

''اکبر تے کل ہویا ای گاچھی

کسب ایہہ دُھروں مقدر ساڈا

لودھی ابراہیم دے ہاتھی ساڈے ای سن لڑوائے

پورس دے وی''

''ہر گئے سو تُسیں تایا سوہنُو دونویں واریں''

''نہیں نا ڈَڈّ سکُولڑئیے

ہار پڑھائی نیں جیہڑی تہانوں

فتح آہی او ساڈی

کابلی گھوڑیوں لاہ بہایا ایتھے کیہنے تیرا ماما بابر؟

ہاتھی ساڈے نے

ست پیہڑیاں ڈاہ اِتھاواں پیا ہویا

جَگ یاہن ہِڑ چڑھیا سکندر ابّا تیرے بابے دا

ڈُھوئی ڈھال رکھ پرتیا نہیں تیرے نانے گھر یونانے؟''

''لڑے وی ہوسن وڈے تہاڈے تایا وِچ مدانے

تاہیوں کم لڑاون دا دِتا بادشہاں نے اوہناں نوں''

پتہ ای کیہ پیا آہنا ایں؟''

''کیہ، دسّو تُسیں؟''

''توں آہناں ایں ہَل جیہناں صدیاں واہے

پہلاں پشُو ہو جُپے ہوسن اوہ آپوں وِچ پنجالی

ڈھگّا کرُو ایں مینوں کہ سانھ

جیہنے دھریا وچھیرا تیرے جیہا ماں گاں تیری دے ڈِھڈیں

مداری تیرے تیری نسل دے نہیوں گاچھی باندر

نچنائیں جیہناں دے ڈمرُو تے

پڑھاواں تینوں ہور ہسٹری؟

ہاتھی نرے نہیں سُور وی اساں لڑائے نی

گل نہ کریں ایہہ داڑھل ولِیدے پھُپھڑ اگے

میرے کول تے بیٹھا مِن مِن کرسی پیا

نالا کھول حلالہ کرسی تیرے جیہے حرامڑ دا

سُور سُورمے اساں کرائے نی

ہِیرو بِیر سلار وزِیرے

صدر صدور مُجیرے

مُلک لڑا اُتے سلطنتاں چڑھوائیاں

مذہب لڑا اساں مُلک تُڑائے''

''کیوں تُساں لڑائی آئے تایا صدیاں بدھی جگ سارا

کیہ مجبوری آہی تُساڈی، مال منال؟''

''اوں ہوں''

''مشہوری؟''

''اوں ہوں''

''ہور کیہ؟''

''اوں …… ہُوں ……''

آکھو تے اِک گل کراں

''کر نہ کر ہُن بھاویں ……''

''تُسیں غصہ تے نہیں کر بیٹھے؟

چُپ کیوں کر گئے او''

''اوہڑ گئی اے…… جو کر بیٹھاں ……''

''کیہ تایا سوہنُو''

''اساں گل پئی پنجالی لاہ نہ سکے

لڑاون ترلا ہا گل ولاون دا

گل ولا نہ سکے

کیہ کیوں تیری دے سچ نوں جیکن

گالھ مندا میرا کُوڑا ٹال نہیں سکیا''

''بٹیرا سٹ دِتا جے بُھنجے

ہولی ہولی چُپ دوالے پِھردائے پیا تہاڈے''

''پر چھنڈ لئے تے اُڈ پوے مُڑ خبرے گاچھی''