[چھبیاں ورھیاں دی لیکھو بیٹھی کُجھ لِکھدی اے- چھوِنجا1 دا سنگروٹ آیا اے، ماما اوہدا]
لیکھو: اِک پچُھ بنی پئی اے چروکی اندر، ٹُھنگدی رہندی اے ویلے کویلے، آکھیا اج پچُھ ای گِھناں تہانُوں ماما
سنگروٹ: سَو پچُھ تُوں - تیرے جیہی دانی لِکھیار تے سرمایہ اے ساڈا
لیکھو: ماما تُسیں ست جُوہاں پِھریاں نیں - جِتھے گئے او لنگر لایا اے اوتھے، سکولاں ہسپتالاں دے امدادی ہوئے او- پچُھنا میں ایہو سی جیہناں نُوں دیندے او، کوئی ویروا وی ہونا چاہیدا اے نا اوہناں دی کیتی دا، کیہڑے لیکھے لایائے اوہناں دِتا تُہاڈا
سنگروٹ: پھیرا پاویں تُوں اوہناں تھاواں تے، اوتھوں رپورٹ لیاویں تے اوہدی دس پاویں اخباراں رسالیاں وِچ مضمون لِکھ کے
لیکھو: تُساں کوئی حساب نہیں رکھیا؟
سنگروٹ: ساڈا حساب ایہو ای اے، جدوں چوناں ہوون تے اوہا لوک جاون اسمبلیاں وِچ جیہناں دی ڈور ساڈے ہتھیں ہووے تے
اسیں اوہناں کنوں لوکاں دے بھلے دے کم کروائیے
لیکھو: تے کریندے نیں او؟ کیہڑی پارٹی وِچ اے اثر تُہاڈا
سنگروٹ: ساریاں پارٹیاں وِچ موجود نیں اوہ جی، تے آزاد ممبر وی نیں جیہڑے لوڑ ویلے وزن رکھ سکدے نیں فیصلیاں دی تکڑی وِچ
1 -چھوِنجا= 56-
لیکھو: ماما، تُسیں آپ کیوں نہیں آوندے اسمبلی وِچ- سِدھا اپنے ہتھ وِچ لؤ اختیار تے اوہنوں ورت کے مُلک نُوں ٹھیک راہ تے پاؤ
سنگروٹ: سیانی ایں تُوں لیکھو- پتہ اے تینوں ساتھوں جِت ہار دی تان جری نہیں جاندی، اوہدے وِچ پھس کے اسیں اپنا کاروبار وی ٹھیک نہیں چلا سکدے، تے اوہ نہ چلاوِئیے تے پیسہ کِتھوں لیاوِئیے لوکاں دے بھلے لئی خرچن جوگا
لیکھو: تے جیہناں نُوں طاقت پئے پھڑاوندے او، اوہ جیہڑی کھیڈ پئے کھیڈدے نیں اوہ تے لوکاں نُوں بھُکھ ننگ دے کھوبے وِچ ڈاہون دا سواد ای پئی دیندی اے نا اوہناں نُوں، تے ایسے سواد دے اوہ نشئی ہو گئے نیں - تے لوکاں نُوں ویکھو نا، اوہ تے جُڑ کھلوون دا اُدم ای بھُل گئے نیں لاریاں وِچ لگ کے
[دو کُڑیاں اندر آئیاں نیں - وڈی میلی اے بائیاں دی تے نِکی ویلی اٹھاراں دی-]
لیکھو: آہا، ماما دوویں آ گئیاں نیں دِھیاں تُہاڈیاں - (وڈی نُوں) میلی باوا جی نُوں لین آئیاں ہو؟
میلی: نہیں - تُہانُوں مِلن لیکھو باجی
لیکھو: میں متے کُجھ کھروی جیہی نہ کر بیٹھی ہوواں تُہاڈے باوا جی نال
میلی: کھرویاں تے میں وی ڈھیر سُناونی آں ایہناں نُوں پر……
سنگروٹ: ایہہ دِھی ساڈی تے تیری پڑھائی ہوئی اے پروفیسر لیکھو- ٹوکدی رہندی اے ہر ویلے مینوں
میلی: پر مجال اے ٹوک میری کُجھ گھساوندی ہووے ایہناں دا- دئی آوندے نیں پیسہ اوہناں نُوں جیہناں ٹھیکہ گِھدا ہویا اے لوک دی سُوجھ نُوں بھُلِیں پاون دا، تانجو رل جُڑن دی لوء ای نہ اُترے اندر اوہناں دے
لیکھو: تے ویلی تُوں ایویں سوچنی ایں جیویں بھین تیری؟
سنگروٹ: ایہہ تے دھیان کریندی اے میرا بہوں - مینوں سُکھی رکھیندی اے وڈی بھین دے دِتے رگڑیاں تے دلاس دی پھٹکڑی مَل کے
ویلی: لیکھو باجی دِل دے سوہل نیں باوا جی ساڈے، اماں نال مُحبتی ورتوں ہر ویلے- نوکراں نال چنگا سلوک، اوہناں دِیاں لوڑاں دا خیال ہمیشہ
لیکھو: میلی دی گل تینوں ٹھیک نہیں جاپدی
ویلی: میلی دی گل اِک وڈے کم بارے ہے، جیہڑا سبھ نویاں جِیئاں دے رل کے کرن والا اے- باوا جی ورگے بزرگ جیہڑی بھلی پئے کریندے نیں اوہ کری آون
لیکھو: میلی تے آہندی اے باوا جی دی نیتی1 عام خلقت نُوں جُڑ کے کرن والے پاسے نہیں پئی کھڑدی
سنگروٹ: میلی دی نیتی وِچ کاوڑ وی آ ویندی اے نا، سختی وی- اوہ میرے وس نہیں
[واکل آ گیا اے، بھترِیجا سنگروٹ دا-]
سنگروٹ: آ واکل- تُوں وی تے ساڈے کم نُوں اوویں ویکھنا ایں جیویں لیکھو
واکل: چاچا جی اسیں تے تُہاڈی بھلیائی نُوں خلقت لئی سُغات سمجھ کے سُکھی ہونے آں پر اوہ ساڈے ویکھدیاں ویکھدیاں ای خلقت دیاں ویریاں دے ڈھائے چڑھ جاندی اے، کیہ کرئیے
سنگروٹ: لوکاں دے ووٹ لے کے اسمبلیاں وِچ بہندے نیں جیہڑے اوہناں کنوں اوہناں دا اصل کم کروائیے تاں ای اوہ سِدھے راہ تے رہ سکدے نیں نا
واکل: سِدھا راہ؟
1 -نیتی= سیاست، پَولیٹِکس-
سنگروٹ: آہو پُتر، لوکاں دی بھلیائی، دُکھ سُکھ جاچنا اوہناں دا، گھاٹے وادھے دا چارہ کرنا
واکل: تے پک اے تُہانُوں ایہا ای پئے کریندے نیں اوہ؟
سنگروٹ: تے تینوں کیہ شک اے
واکل: جے کریندے ہوندے تاں پَونی صدی وِچ ایہو حال کیوں رہندا
خلقت دا، ہر جی نُوں آپو اپنی پئی ہوئی اے، کِسے دی ہے کوئی چاہ دُوجے نال اصلی؟
سنگروٹ: تیری تے لیکھو دی آپسی چاہ نُوں کیہ آکھیئے پھیر؟ کٹھے پڑھے او دوئے تے جیہڑی یونیورسٹیوں پڑھے اوتھے کٹھے ای پڑھیندے وی پئے او، وکھ کدے ہوئے ای نہیں - ایہہ چاہ توں واہنا سانگا اے؟ میں تے بھرا اپنے نال وی کیتی اے کئیں واری، جو ہُن ویاہ ہو جانا چاہیدا اے تُہاڈا
ویلی: آکھیا اے تُساں چاچا جی نُوں تاں من گئے ہوسن
سنگروٹ: آہندا اے میں گل کیتی اے، اوہ دوئے آہندے نیں ساڈا تے ہو گیا ہویا اے- اکھے پچُھیئم کدن ہویا اے، سانُوں تے خبر ای کوئی نہیں، کوئی ساہا کوئی جنج کوئی ولیمہ
واکل: ایہہ گل اساں تے کیتی کوئی نہ- سمجھوتی وِچ ہا ولدا اساڈا
میلی: بس پھیر سمجھوتی نُوں چاچے باوے اِنج اُتاریا اے اپنے من وِچ
لیکھو: سمجھوتی تے ساڈی ایہو آہی جو ویاہ ہو نہیں گیا اساڈا، ہوندا اے پیا پلو پل
واکل: تے ہوندا ای رہنا اے
ویلی: پر کیہڑی تھاویں تے کیہڑے ویلے
لیکھو: ویلی، اوہ تھاں تے ویلا اوس جہان وِچ اے جیہڑا ایس چالُو ورتارے دا اُلٹاء اے
سنگروٹ: تے کیویں اپڑئیے اوتھے اساں
لیکھو: اپنائے ورتاریوں نِکلو تے اُتھاں آ وسّو (لیکھو تے واکل دوئے نچ گاوندے نیں)
آؤ تے وسّو اپنے آپ نال
اپنا مُول ای کُل زمان مکان اے
میلی: (نچ رلی اے)
اُتھاں دُوج تے ہے ای کوئی نہ
کہیں نُوں کہیں کولوں وکھ رکھن لئی،
رسّو آپ مِلاپ نال
(ویلی سنگروٹ نال کِکلی پاوندی رلی اے)
سنگروٹ: ہُن دین جوگا میرے کول نہیں کُجھ وی،
سار ہوئی اے اپنے آپ دی
روٹ1 دی اوٹے2 بھُلیا بیٹھا ساں،
سنگ ہے ہر کوئی ہر ہر دا
لیکھو: بھُل ساڈی دے اندر ای جان پچھان وی لُکی پئی اے
1- روٹ= روٹی- 2 -اوٹے= اوٹ وِچ، اوہلے-