''بھانڈے کَلی کرا لؤ''
''چِراں پِچھوں اج واج پئے تیرا سُننے آں نُوری
سُر اوہا ہیک وی اوہا''
''تیری گلی اج آئے آں سبھیا
سہج سبھا ای بول پیا ای ہوکا پُرانا،
کم تے چروکا چھڈیائے
بھانڈا کِسے کول کوئی نہیں کلی کراون جوگا،
بول کلام سُنا گا دِل پئے لاونے آں
ویلا پیا لنگھاوندائے سانوں
کہ اوہنوں پئے اسیں لنگھاونے آں''
''بھانڈا تے نُوری ہر کِسے کول ہویا
کلی نہیں کوئی کراوندا اوہنوں''
''بھوئیں بھانڈے دی گل پیا کرنائے سبھیا؟''
''اوہ تے کِسے کِسے کول ہویا،
جو نک کن سُندے سُنگھدے نیں
اکھاں ویکھدیاں
جِیبھا جو چکھدی اے
ہتھ پئے ٹوہندے نیں
چِت چیتے وِچ جیہڑا لیا سبھ دھردائے
اوہا ای بھانڈا اے''
''اوہنوں تے سبھیا مندر مسِیتاں گِرجے کلی کراوندے آئے
پھیر اخباراں آ گئیاں
ہُن چَینلاں نیں''
''پُھوکنی کون پُھوکدائے ایہناں دی نُوری
کلی ایہناں نوں کون لیا کے دیندا اے''
''اوہا
مندراں مسِیتاں گِرجیاں نوں جیہڑا دیندا آیائے''
''اوہ اُپر والا؟''
''نہیں اوہ تے سبھ کول ہویا
ایہہ ہیٹھاں والا
بھوئیں بھانڈا، جیہڑا کِسے کِسے کول ہوندائے''