فرید بھنڈار

''یار ایہہ ناں کیہ ہویا، کرم چند،''

''کیہ پتہ

جو رکھیا سو رہ گیا،''

''چند دا مہر کہ اوہدا کم؟''

''کم وی ہے کوئی اوہدا؟''

''راتِیں راہ وکھاونا''

''بُھلاونا''

''اوہ کیوں''

''راہ تے رات وکھاوندی اے''

''کیہڑا''

''جیہڑا دِنے نظر نہیں آوندا''

''تانیئِیں گھر نہیوں وڑدا راتِیں،''

''چند پانی نُوں چِھکدائے اُتانہہ ول

سمندر چڑھدے لہندے نیں

ایہہ وی تے کم اے اوہدا''

''اپنے کول پانی جو کوئی نہیں''

''سمندر آہندے نیں

اساں نہیں آونا

تیرے کول تے تھاں ای کوئی نہیں ساڈے جوگی''

''سوہنا لگن نہیں کم اوہدا؟'' ‘

''تے چھائی جیہڑی سُو اُتے''

''اوہا تے ہے اوہ جو ہے''

''سورج دی لوء نال میک اپ کر کے آوندائے

آپ تے کالا اے''

''یار اِک کرم کرو

ایہہ ناں لؤ ای نہ''

''تے کیہ آکھیئے تینوں، قلاقند؟''

''آہو،

کلّا کندھ

باقی بُوہے بند''