فرید بھنڈار

پارک تے سبھناں لئی اے،

اِکو ٹریک تے سَیل دے پیر وگاون

پدم پتی تے بُھکھ سَتی،

اِکو جائیں ڈُھک پَیلاں پاون

مور شہانے کاں ورانے،

سوچیں گُٹے گلاب پئے نیں

اِکو سُگندھ سُنگھائیے کیویں

بھیت سُچیتی ناساں نوں،

پئیاں دلِیلے نرگس نیلوفر وی

بِھڑدیاں تکنیاں 1 اندر کِیکن اِکو رنگ لوائیے،

سوچن ایانے

تُساں سیانیو اپنے بھانے

کیتی پارک مسیتی

جِتھ اِک صف دو گھڑیاں لئی محمود ایاز کرائے

کیہڑیاں وَلّاں 2 ول کَھلیاں نیں لاہے تہاڈے

سَری ہے کِس پروار گھال کمیراں دی

مالی کیہڑا ایہہ پھولن پھولے

کیہڑا کھوجی پیراں دی جِبھ ہو بولے

1- تکنیاں = تکنی دی جمع (تکنی= 1) تک، نظر، 2) اُمید، آس، 3) ویکھن دا انداز)-

2- ولاں = ویلاں -