شام دی بانگ مِلی
ساہ گُھٹ دھوئیں اُپر کنبدی اُٹھی کہاء
کوہاں توں لاؤڈ سپیکر
کَھلیاں باہیں کوئی دُہائی آخر دی
ڈُبدے دینہہ جہاز تے کیہڑے حج چڑھیا
ایہہ شہر مینڈا مسکیناں دا
کیہڑے گناہ دی پیشی خبرے ہوئی اے
سُکھ دی ٹاپ 1 لئی
سہج سلُونے لئی
مساں چُلھے جوگی اگ تے اندر ڈھوئی اے
نہ جُھور منا
سُن ہولی ہولی چڑھدیاں رات سمندر لہریں
سمی کھیڈدیاں
''رَلن سو ہانی نیں
جیہڑے موری وگدے آئے نیں اوہ وی پانی نیں''
1- ٹاپ: روٹی