] سرگھی نوری فتُوری تے میرُو بھمبیرُو نال پئی جاندی اے گاوندی شہروں باہر [
کچّے بھانڈے رکھیئے
کِچّر تائیں نِیر
نِیر
کِچر تائیں نِیر
مِیرُو: بھانڈا ایہہ کِتھے اے ماسی سرگھی
سرگھی: سبھ تھائیں مِیرُو بھمیرُو میرے
ایہہ ورتن ہے،
برتن آکھ لؤ جے وا نہیں جِبھ نُوں وارے
نُوری: کھاون پاون تے رہن دا آہر
مِیرُو: جِیوکا؟
سرگھی: آہو جی جی دا، کُل جگ تے
مِیرُو: ورتن بھوگدیاں جی دا جی نال لاگا لگدائے
اوہ ہویا نہ واہ ورتن
نُوری: ورتن جیہڑے ویلے آہری دی اپنی نہ رہی،
واہ ورتن وی غیر ہوئی
آہری وگاری تھی گئے
مِیرُو: جِیون جِیون دا وَیر تھیا
نُوری: لہور شہر وچ سوا پہر دا زہر قہر
مِیرُو: وکھ وکھر دی کھچ تان نال بھانڈا کچّا ہویا
سرگھی: نِیر…… ہا…… نِیر
نُوری: نِیل سروور
مِیرُو: نِیلا امبر
سرگھی: ہا…… نِیر…… اکھیں دا کِھیر
رنگ میں چُوہڑیٹڑی دا
[پِچھوں سائیں رکھّا باہوڑ پیا اے]
رکھّا: جیویں سرگھِیئے میرئیے
کِدے پئی وینی ایں
کھڑنی ایں پئی نال ایہناں نُوں چِٹے دینہہ کِدے
سرگھی: گھر تیرے
رکھّا: بے گھر
سرگھی: آہو، بس اوتھے ای
نُوری: ایتھے ای ہویا نا اوہ تے ماسی
سرگھی: کِتھے؟
نُوری: جِتھائیں پیر نیں ساڈے
رکھّا: (نچ کے) ایہا ایہا بس ایہا ایہا……
ایہا ایہا بس ایہا ایہا
سرگھی: (گاوندی اے) کندھی اُتے رُکھڑا
کِچِّر بنّھے دِھیر
نُوری: سبھ رُکھڑے اساں
کندھی اُتّے نَیں دی نہیں
سرگھی: کِتھے ہاں وت
نُوری: لاہے دیاں کرخانیاں دے
مُوتر روڑھ دی کندھی اُتے
سرگھی: نِیر…… ہا…… نِیل
نُوری: رنگ اساں چوہڑیٹڑیاں دا
مِیرُو: اساں رُکھڑے
آپے اساں بُہارِیاں ہاں
پھر پِھر ہُونجھ دینے نیں
کُلّ کُوڑ کرخانے
بہانے لاہے دے
سرگھی: بھانڈے صاف ہو وَیسن
مِیرُو: ماسی، بھانڈا اِکو ای نہیں؟
سرگھی: اِکو ای اے پر دو وی، مِیرُو پیارے میرے
نُوری: اِک ورتن
کھاون پاون رہن
سرگھی: دُوجا بھانڈا
بولن سُنن نُوں،
ویکھن سُنگھن، ٹوہن چکھن نُوں
دھر اندر اپنے پکیندا اے
نُوری: وچ ارتھ سواد بھریندا اے
مِیرُو: سو بھانڈے دو ہوئے
اِک ورتن
اِک سُرت مَت
سرگھی: ورتن وچوں ای سُرت مت پئی سَردی اے
نُوری: سَر کے ورتن نُوں کُوچ مانجھدی
بَھن مُڑ گھڑدی اے
مِیرُو: سو دوئے اِک تھیون کُل جِیا جُون دے
تاں ای پکدے نیں
نہیں تاں رہندے نیں کچّے
سرگھی: کچے بھانڈے رکھیئے کچر تائِیں نِیر
کِچِر تائِیں نِیر
نُوری: کیوں سائِیں رکھیا؟
رکھّا: آہو کیوں،
کیہ کیویں کاہنُوں تے میرے انگ نیں، نُورِئیے بھنڈ جو ہویا میں بھانڈیاں دوہاں دا
مِیرُو: تُوں بھنڈاری نہیں سائِیں؟
رکھّا: کیوں نہیں
پر بھنڈن ای بھنڈارا کردائے، گھال اُپائے نُوں ونڈ سواہرا
نُوری: سو سارے اسیں ہاں بھنڈ بھنڈاری، دوئے بھانڈے جوڑ کے اِک کرینے آں، کچے تروڑ گھڑینے آں وت پکّے
سرگھی: نِیر…… سِیر…… اساں آپے ہاں
کِچِر وی آپے چِکڑ وی آپے
آپے ہر ہر نِیل کَول
کمِیاں نیں کُل کمیرے
رکھّا: نہ کائی گھیرے، نہ کائی بَنّے بنیرے
نُوری: پاونے آں نانہہ وچ ہاں دے پھیرے
مِیرُو: جو میرے سو تیرے نُوری
جو میرے سو تیرے
[ رَل گا نچدے نیں سارے]
رکھّا: ایہہ پندھ اَمُک ہی ہے گھر سبھ دا، ایہدا اچنبھا اَمُک انند ہے