اوہ چار جنے نیں
پنجوِیں جنی اے،
پنجے پُگی عُمر دے نیں،
ستراں دے پیٹے وِچ ای ہوسن
جیہڑی گل ہُن کوئی نہیں کریندا
اوہ کری آوندے نیں:
سانجھ ورت ورتاون دی
سرمایہ داری ویہار نُوں جڑھوں پٹاون دی،
تھاں تھاں پِھردے رہندے نیں پنجے
''بُڈھڑا اَن تھک پنجہ''
لوکی ہس ہس آہندے نیں،
دو چار جی وی آون کول تے
تے کُھل کے گل کرن بہہ جاندے نیں،
نہیں جھکدے نہیں اکدے تھکدے،
کوئی آکھے جے آ کے
بابا ہُن تُسیں اَرام کرو
ایہناں گلاں دا ویلا نِکل گیا اے،
تاں مائی آہندی اے
''پُتر ہُن تے آیا اے ویلا
ایہہ سچیاں مُڈھ توں نوِیاں کر سُناون دا
تھاں تھاں پنِیری مُڑ لاون دا''