پیرپئے آہندے نیں
سانوں ننگ پھرن دے مُڑ کے
تینوں تینڈیاں وڈیاں
گلیاں چ لہن نہ دِتا
نہ اساں چکھیا گِلا گوہا
چِکڑ نہ چَکھیا واہناں دا
اُپر دوپہراں تائیاں تلیاں
اندر نموشی ٹھاری
تَرَک جُراباں دا ہُن ساڈے مَتھے لاؤنائیں
حرفاں نال دھواونائیں سانوں
پیر پئے آہندے نیں
اساں وگسائیں جِدے وگنائے
سِر تینڈے کنوں راہ نہیں پُچھنا
پیکھڑ نہیوں پوانے تینڈیاں کتاباں دے
حق کمائیاں تینڈیاں دا اساں بھار نہیں چائی وتنا ہُن
جَرن دے ٹھنڈڑا تتڑا خاکو جائیاں نوں
بھوگ بُھگا نہ سانوں آپنیاں کرماں دا
پیر پئے آہندے نیں
یار رُلن دے سانوں
رُلدے رَل ویسیائیں