ایہہ پنجویں دی گل اے
سن چھتالی
ستر اکہتر تائیں تیرا ناں وی یاد ہا مینوں
مُڑ وِسرن لگ پیا
پر دھیان دینا تے یاد آوینا
کِتلے دھر بُھلی کوئی جیویں کتاب نہیں ہوندی
مُڑ بُھل جانا
تیرے نال ایہہ بُھل چیتا اِک کھیڈ جیہی بن گئی
پنجویں وِچ اِک ڈسک تے بیٹھے
مونہاں اگے کتاباں کیتی ہر گل دی جیویں کھیڈ بنا لیندے ساں ایویں
تے ایویں ہس پیندے ساں
ماسٹر رحمت علی ہا کوڑا
کوٹ دے کھیسے وِچوں دو گِٹھ لما ڈنڈکا کڈھنا تیل پوایا
کسے ویلے وی کسے نوں اگے دھر لینا
پر سانوں وِچ وِچ ہسدیاں تاڑ وَلا جانا
میریاں وڈیاں دے مونہہ نوں خبرے
یاں تیرے آپنے مونہہ نوں
میں شرمندیاں ہو وینا اوہنوں جردیاں ویکھ کے
مینوں ویکھ کے توں شرمندیاں ہو وینا
پر تھوڑے چِر وچ ایویں جیہی کوئی گل ہونی اساں گُڑک پَینا مُڑ
یاری وی ایڈی کوئی نہ آہی
پنجویں وِچ ای میل ہویا ہا ساڈا
سانجھ وی ایڈی کاہدی، تیرا محلا کِتلے میرا کِتلے
ہاں دھوبی دھوتے پاون دی سانجھ ہووے تے ہووے
ہسدی شکل تے چیتے آویندی اے تیری ناں نہیں آوندا
خرابی جیہڑی ہوئی اوہ ایہہ لگدی اے
جو اِک واری بُھلن لبھن توں تھک تیرا ناں کیلاش میں دھر بیٹھا
ایہہ پک شک ہوندیاں جو ناں تے تیرا ہور ہا
ایسے رنگ دا ہا اوہ بھاویں
ہن جدوں وی تیرا ناں میں بھالن سن چھتالی وڑناں
کیلاش ای اگے آن کھلوندائے بوہا مل کے
بُھل بھالن دی کھیڈ ای شودھی مُک مَک گئی اے
بوہا کُھلدا نہیں ''کیلاش'' کھولناں
کے لاش؟ نہ کیلا، شُو، مونہہ اگے اُنگل
پیسے دے تِن سَن چھتالی
پیسے وِچ جد موری ہوئی تے اِک پیسے وچ اِکو آون لگا
باڈر بند ہویا تے کیلا شو ہو گیا
لہور وزیر اعظم آیا
کیلیوں باجھ اور ناشتہ نہیں سی کردا
جھٹ دا جھٹ تاں باڈر کُھلیا
ناشتے جوگا کیلا اندر آیا
اُنج ناں بُھل ونجن سنیائے کوئی بیماری اے بُڈھے وارے دی
ہولی ہولی آپنا آپ اُتارن دی
مائی رادھی آہندی ہوندی سی ناں بھارے ہوندے ہن
اِک ناں ہیٹھ بے اوڑک ناں دب جاندے نیں
ہر ہر ناں اوہناں وِچ اوہ اے جو نہیں رکھیا جا سکدا
رکھو تے بُس جاندائے
رادھی پہلوں چوہڑی سی
کملی ہوئی تاں مائی اکھواون لگی
عجب گل اے مائی رادھی دا ناں مینوں کدے نہیں بُھلیا
نہ ماسٹر رحمت علی دا
سچ کیلا شُو تے دوجی تیجی وِچ ای ہو گیا ہویا سی کہ
''کیلا لینا ای'' اِک مُنڈے دوجے نوں کہنا
منیٹر ماسٹر کولوں بینت پوانے دونہاں نوں
''گندی باتیں کرتے تھے جی دونویں''
گل ہور دی ہور بناون وی بیماری بُڈھے ای وارے دی اے
شکلاں چیتے رہندیاں نیں ناں بُھل جاندے نیں
ناں شکل دی سانجھ جیویں کوئی کچ پک لیکھا ہووے
چیچو چیچ بُھلیکھا
مائی رادھی آہندی ہوندی سی
کِنے ای ناں اگیرے ہو کے کنیاں نوں پِچھے کر گئے نیں
بَدل گئے نیں چیتا، چیتے والا
اوہدے کولوں ہور دا ہور کرا گئے نیں
مر گئے نیں مروا گئے نیں
اِک بُھلڑ بارے اِک بیلی دا دسیا مینوں کدے نہیں بُھلیا
(ناں دونہاں دے ویکھو چیتے آ ونجن جے گل کریندیاں)
بیلی آہندائے میرا سمجھو تایا
سنتالیوں پہلاں دا مسلم لیگی لیڈر وڈا
ہر واری اوہنے پُچھنا پُتر شکل تے تیری بُھل نہیں سکدی
ناں بُھل جاناں
میں دَسنا تے پولی جیہی چنڈ مار کے آکھنا
چل اوئے سُورا
میں تے ایویں ہسنا ساں پیا، آپے رکھیا ناں میں تیرا بُھل سکناں
بیلی دسدائے اِکدن تایا سیر تے مِلیا مال روڈ تے
''پُتر ناں تے تیرا بُھل نہیں سکدا آپے رکھیا
شکل بُھل گیاں تیری''
میں ہسدیاں آ کھیا
''تایا جی ایہہ شکل وی کیدھرے آپے تُساں نہ رکھی ہووے
بُھل بھلیکھے''
لؤ جی چنگی بھلی چَنڈ مار کے آہندائے تایا
''میں رکھی سی؟
دس اوئے کتھے رکھی سی میں
کیہڑے کنجر رکھی سی ہیں دس اوئے
جُوٹھ جہان دا کِتھوں پَلے پے گئی اے''