[جُون کھر باغ وِچ بھوندا اے پیا، ترِیہاں دا ہوسی- اِک بنچ اُتے رنگی باوا بیٹھا ہویا اے- چِٹے وال نیں -
دُوجے بنچ تے مائی سبھال اے- لگ بھگ اوسے عمر دی- دو بال وی نال نیں - اِک کُڑی تے اِک مُنڈا-
رل کھیڈدے نیں پئے]
جُون کھر: باوا جی اِک گل پچُھنی ہئی
رنگی باوا: پچُھو بھائی
جُون کھر: ایہہ لفظ اے نا نِرت، ایہدے معنے کیہ نیں
رنگی باوا: کیہ لوڑ پے گئی اے تُہانُوں ایہدی
جُون کھر: میں باوا جی اپنی بولی دی ارتھالی پیا بناونا-
کوش جیہنوں آہندے نیں ہِندی وِچ، لُغت اُردُو وِچ تے ڈِکشنری انگریزی وِچ
رنگی باوا: کون پڑھسی ایہہ ارتھالی تُہاڈی
مائی سبھال: جیہڑی پچُھی اے اوہناں اوہدا پرتاوا دیو نا
رنگی باوا: صبر کر- دیون تے لگاں ……
نِرت تے بھائی آہندے نیں نچن نُوں
مائی سبھال: نِرت خالص اے اصلی
رنگی باوا: لؤ دسّو بائی، ہُن میں کیہ آکھاں
جُون کھر: (گل لمکدے بستے وِچوں کاپی کڈِھیوس) میں لِکھ گِھناں
رنگی باوا: رہن دیو بھائی، تہانُوں پتہ ای اے جنانِیاں نُوں لَت ہوندی اے وادُھو گلّاں کرن دی-
جُون کھر: مائی جی تُسیں ایہہ ارتھ نِرت دے کِتھاؤں سُنے نیں
مائی سبھال: کیوں، تہانُوں اوپرے جاپدے نیں؟
جُون کھر: میں پہلی واری سُنے جے
مائی سبھال: ٹوہو نا اکھر نُوں نِرت……
نِرا ہوون، جو ہے اوہا ای،
کوئی رلاء نہیں
جُون کھر: تُسیں پنجابی پڑھاؤندے او؟
مائی سبھال: نہیں
جُون کھر: مینوں حوالہ دینا پوندا اے نا ارتھاں نال
مائی سبھال: بس ایہو لکھ دیو، میں باغ وِچ اِک جنی نُوں پچُھیا تے اوس ایہو دسیا
جُون کھر: تہاڈا ناں؟
مائی سبھال: نِرت
جُون کھر: سچی مُچی؟
مائی سبھال: نہ…… ایویں جُھوٹھی مُوٹھی
جُون کھر: مائی جی مت میری مار چھڈی اے تُسیں تے
رنگی باوا: (ہس کے) ہور پچُھو تُسیں بھائی جی- جنانیاں تے ڈھیر ہوسن باغ وِچ…… ڈِکشنری تہاڈی بنی کہ بنی اجو ای
مائی سبھال: (جُون کھر نُوں) ہے کوئی ایس سنسار وِچ اوہا جو اوہ ہے؟
جُون کھر: ایہہ میں کیویں جاچ سکناں
مائی سبھال: اپنے آپ نُوں پچُھ ویکھو
جُون کھر: سارا جہان ای انِرت اے
مائی سبھال: نِرت انِرت
(بال نچے نیں دو پَل)
جُون کھر: ایہہ ناں نیں ایہناں دے؟
مائی سبھال: ہے وی نیں تے نہیں وی
رنگی باوا: (جُون کھر نُوں) اوہناں نِرت دے اصلی ارتھ دس چھڈے نیں تہانُوں، ہور کیہ چاہوندے او
مائی سبھال: اوہناں بھنگڑا پایا اے میری سُن کے
رنگی باوا: آہو لِکھ لؤ اوہناں بھنگ کر دِتی اے ایہدی
جُون کھر: ارتھ رلا کے اِک کر دِتے نیں اوہناں …… دانے بال نیں ……
مائی سبھال: قدرت دی نیڑ دا دان پئے ماندے نیں اجے- نِرت اصلوں ہے تے ٹُرن ای،
ایہنوں انِرت کر وست وِکاوُ کر دِتا اے دُنیاداری نے
رنگی باوا: ساڈی عُمرے تے ٹُرن دا ست وی نہیں رہندا- اسیں تے بیٹھے وی اَک تھک گئے آں
جُون کھر: (گھڑی ویکھ کے گُٹ توں) میں گھنا تھورائیت آں تُہاڈا، ہُن آگیا دیو باوا جی
رنگی باوا: ایہناں بالاں کولوں ای گِھنو آگیا
[جُون کھر بالاں دے سِراں تے ہتھ پھیر ٹُر گیا اے-]
بال نچ کے گاوندے نیں:
مُنڈا: آیا آیا
کُڑی: گیا گیا
(دوئے رل کے)
گیا آیا تے آیا گیا
مائی سبھال: لَبھ گئی اے رل گھڑی کھڑائی
سارے: دُھپ گئے نیں
کر پیر ویلے دے
گیا آیا تے آیا گیا