بوکا سَکھنا پرت پیا آکھدا اے
میں کیہ کر سکناں،
پُچھاں لج نوں ہور کیوں نِیوندی نہیں
اگوں آکھدی جے دس میں کیہ کراں
جِتنا تینوں میں ہیٹھ لمکاونی آں
پانی ہتھ دو ہور تھلے ہو وَیندائے،
تینوں پانی دا واج سُنِیوندا نہیں؟
آہندائی پالناں پَیلیاں اوہناں دِیاں
بُھکھ جیہناں دی مُکن تے آؤندی نہیں
لد چاوندی او گھال ماڑیاں دی
کچا مال کر ڈھوندی او منڈیاں وِچ
پکا مال بن پرت مُڑ آوندی او
رہندا ماڑیاں دا کھس کھاوندی او
بوکے تینڈے چ پے چھوہاں بُل تَسّے
اوہناں ماڑیاں دے، کرن ہاریاں دے،
مینڈے وس ناہیوں
آکھ اوہناں نوں تَسّ نوں کرن پانی
ہڑھ ہو جو بنھ تروڑ کھڑے
مَل موہ دے راج نوں روڑھ کھڑے