''اوہنے چھڈیا نا جِسلے
لک میرے تے چھانٹا
تاں چابک میتھوں چُھٹ پئی
گھوڑی سڑک تے ٹُٹ پئی
سُنیا ہویا اے نا ایہہ جوڑ؟''
''جی، سُنے ہوئے نیں دوئے''
''دُوا کیہڑا
میں تے اِکو بولیا اے''
''دُوجا اوسے اِکو آپے ای تولیا اے
بول تے پُج گئے نیں
تول وی کُجھ پُجا ای دیو
اکھراں دا آپ ای اپنا تروڑ وی ہوون
کوئی ساڈی بولی دی بان نہیں
مینوں تے اپنی بولی دی وی
پُوری سُنجان نہیں
کیتی گل میری گُجھ ہوسی
تُسیں تے روشن دان ہوئے
چِت چیتے وِچ تُساں دے
سترنگی بل بجُھ ہوسی''
''وت وی مہر کرو
رتہ نتارا''
''چنگا، خبرے ماڑا،
لؤ سُن لؤ''
سُن کے آپے پُن لؤ،
چھڈّن بس کرن وی ہے
تے مار مار کے تن تے
لَسّ دھرن وی ہے،
چُھٹن وکھ ہو سرن وی ہے
تے جُڑ ورھن وی ہے دُوجے تے
ٹُٹن بھج سڑکے ڈھے جاون تے ہے ای
ہور ترِکھی دوڑ کر کے
اگلے دے گل پے جاون نہیں؟
دسو نا
چُپ کیوں کر گئے او''
''کیہ دسیئے
کھول دساون
گُن جھلِیں پھساون ہویا،
لؤ چلیئے نہ ہُن؟
پوہ اساڈا
ہاڑھ ساون ہویا
اگلے پھگن
ہُن تُساں نُوں مگن کریساں،
رہند کُھوند دا دُھوں دُھکھا کے
ٹھار تُساڈے اندر بھریساں''