فرید بھنڈار

اسیں اِک پِنڈ وِچ

رنگ لاون پئیاں جاونیاں،

وڈی سڑک اے چَوڑی

نال کوئی پگ ڈنڈی نہیں

پِچھوں اگوں کاراں ٹرَکّاں

موٹر سائیکلاں دا ہڑھ اے،

اِک تھاں سڑکوں ہیٹھ کھلوتا بابا

چِٹی داڑھی

چِٹے پَٹے،

سانُوں روک پچُھیندا اے

''کِدّے پئیاں ویندیاں ہو''

''جَگر سَگر''

''ڈَھلو ہیٹھ، میں کھڑناں''،

اسیں ڈھلیاں،

بابا لنگڑا سوٹی پھڑ ترِکّھی ٹورے ٹُریندا

گھاہ دے وِچوں پاہا کڈھیندا

سانُوں جَگر سَگر لے آیا اے،

جیہنے سانُوں سدیا ہا

اوہ مائی کَھلی اُڈِیکدی اے

بابا آہندا اے اوہنوں

''لے، آئیاں نی

دِھیاں پئی اُڈِیکنی ایں تُوں

شہرِیں پڑھنے پائِیاں،

زہر قہر جیہڑا شہروں سرسر

ایتھے آیا پیا اے

ایہناں ہو کِھڈکاراں ہُونجھ کے اوہنوں

گھر گھر اندر دھرنیاں نی چِھٹکاراں 1

تریاقل2 سِیروری دِیاں''

1- چِھٹکار: ترونکا، چِھڑکا (نار)- 2- تریاق: زہر دا تروڑ- تریاقل: زہر دا تروڑ کرنہار-