]دو پُرانے سنگی
گدھُو تے واتی
کم کاروں ویہلے ہو کے
کُھلّی تھاں وِچ
گھاہ تے آئے بیٹھے نیں [
گِدھُو: (نچ سَینتر نال گنویا اے) جی کرے جِس ویلے
سد لؤ مینوں
کول بہا لؤ
کُھل کے کرو جو دِل چاہے
بھنڈو نِندو سلاہو
پرت کے کرو نہ کرو جیہدے نال مرضی
دَسّو اوہنوں بھاویں
’ویکھو بھولا کیہ بکی آیا اے‘
بھاویں ’گُنگا بولا، کیہ اوس کرنی سُننی‘
واتی: ایہہ کوئی گاون اے گِدھو یار؟
گِدھُو: تے تینڈے بھانے کیہ اے ہور واتی
واتی: کہیں کُوں سُناون توں پہلاں گَوہ کریندا اے بندہ
گِدھُو: سو تینڈے لیکھے اسیں بندے کوئی نہیں، ٹھیک وی اے، بندے دی شناس تے بندے نُوں ای ہو سکدی اے
سُنی تے ہونی اے تُوں، پر کِتھوں:
’جیہڑی چوری اوہا پھاہا‘
واتی: ہور لؤ- اکھان دا وی مسان بنا دھریوس
اوئے ’پہلی چوری پہلا پھاہا‘
پر کیہ کرے کوئی
گِدُھواں دی بُدھ وی گبُدِھی ویندی اے
جد تائیں تندور دا تاء نہ لگے سُکدی تے نہیں نہ
گِدھُو: چلو چھڈو ایہہ ٹوک ٹِچکر دی داتی- حضور تُہاڈے تندُور وچ لگ تے گئے آں ہُن، لاؤ سیک تے دسو ایہہ گاون نہیں تاں کیہ اے جیہڑا ساڈے مُونہوں اُبتیا گیا
واتی: چلو سُناؤ بات واتی صاحب، مننے آں تُہانُوں مہا بتوا
واتی: لؤ سُنو، بُدھ بھرے گِدھُو بُدھُو مہاراج:
ساڈے جھیڑے وچ ای لُکی بیٹھی اے کہ صاف پئی دِسدی اے اوہ وار جیہنے
اَینیاں ورھیاں دیاں سنگِیاں وچ مُدَپّا جَڑیا ہویا اے- بندِیکے جِیون وچ کیہ ہویا- لکھاں ورھیاں دی رل کرنی وِچوں ای سانبھن مَلّن والی ڈھانی اُسری جیہڑی اج راس والی دے رُوپ وچ جِیون نُوں ای مُکیندی اے پئی، جِیون نُوں ودھاون تے اگیرے کھڑن دیاں دعویاں اوہلے- کھیالڑی ساڈی ساڈے جھیڑے وِچوں ای نتار کے اِک اگُونہی بنتر اوہدی ساہویں پئی کریندی اے-
جھاکی 2
]لاکھی جنگل دے رُکھ پئے گلاں کریندے نیں [
رُکھ: گُوڑھی ہریاول ہے اساڈی لاکھی جنگلاں دی
ایہہ گُوڑھ سُنگھن سبھ جِیاں دا میلا انند مِلاپا
رُکھ: کون ہوندے نیں لاکھی اوہ جو ہر دُوجے وِچ اپنا آپ سُنجاندے نیں
اپنے آپ وِچ ہر دُوجا
ایہہ سُنجان ہے دان دا مان ای
اِک وِچ سبھ دا ہوون
سبھ وِچ اِک دا
]اِک جنا تے اِک جنی جنگل وِچوں نِکل کے وکھو وکھرے راہیں پے گئے نیں [
رُکھ: ہِیر ہے ہریاول ساڈی،
رانجھ رانجھے دی ساڈی سانجھ،
ایہہ نہ ہوون تے اساں وی کوئی نہیں،
عشق بِنا سبھ وانجھ ]رل گنودے نیں [
جھاکی 3
]گِدُھو تے واتی دوئے ہُن کُڑیاں نیں
پاؤندِیاں نیں کِکلی پئیاں [
سار تھئی اے اسیں تے ہاں جُڑتال
جُڑت سُجھاون
سجُھی نُوں اندر اُتار نِبھاون
ہوند ہے ساڈی،
سُنیاں جے تقریراں
اُجڑیاں دِیاں،
”وکھر اساڈا جِیون ہے
نشہ اساڈا وکھو وکھ ہو لاہا دھوئیں دا پیون ہے
لاہے دی تَس ہور ودھاون
ہوند ہے ساڈی،
دساونیاں ایہہ ایہناں نُوں
ایہہ ہوند اہوند جے کُل دی
بھالو اندر اپنے
لکی بیٹھی جے ایسے دی ہڑتال
سیانو مانو
کرو اپنی پڑتال
گِدھُو: واتی
لوک بولی دا الوک ہوون
سُجھا دِتا اے تُوں ایہہ تقریر سُنا کے
واتی: تیرے سُنائے گاون ای کیتا اے کم
گِدھُو: ایسے الوک بولی وِچوں ای سجُھی اے
ایہدی ناہی،
واتی: ایہدی ناہی کُل اِکائی دی آہی اے