فرید بھنڈار

''کیہ کرئیے، کھیہڑا نہیں چھڈدے''

''کون؟''

''ایہہ کھوپے کھڑیپڑ''

''تُوں شاعری دا کھیہڑا چھڈیں تاں اے نا''

''ایہدے چ شاعری کیہڑی اے؟''

''کھے کھے کھے''

''ایہہ شاعری کھنگدی اے پئی؟''

''لؤ، ہور وی کھے اِک آ گئی جے

چل گل کر جیہڑی کرن لگا سیں''

''چلو رہن دیو،کھیہہ کر چھڈی اے گل تُوں میری''

''کھیہہ تے سادھو کر دیندی اے''

''لکھاں مَل نِکلے

کھیہڑا نہ چُھٹیا اوہناں کولوں''

''کاہدا؟''

''کھوپیاں کھڑیپڑاں دا''

''کھوپے پائیدے نیں،

کھڑیپڑ پے جاندے نیں''

ہاں، اِک اوہ وی تے ہوندے نیں

کندھاں تے تھپ کے لاہے نہیں جیہڑے جاندے؟

پر تھپیاں تے کھوپڑیاں وی لاہونیاں پیندیاں نیں''

''بُہتے نہیں لاہوندے،

اوہناں نوں تھپیاں سُکھاوندیاں نیں''،

''گل مُڑ وِچے ای رہ گئی،

کم تے کھوپے کھڑیپڑ اِکو ای کریندے نیں''

''کیہڑا''

''ڈَھکن دا''

''کھوپے ڈکن دا کم وی کریندے نیں''

''ہل کیویں وگن کُھوہ کیویں گِڑن

جے کھوپے نہ پائے جاون''

''کھوپے لہن تے گِڑ وگ ہل کُھوہ

دھرتی نویں کرن،

سَلّھ نہ لگن نہ ای کھڑیپڑ آون''

''سُن لؤ شاعری،

کھے ہور آ گئی جے،

دسو میں کیہ کراں

ایہہ کھاواں کہ کُھوہ وِچ چھال مار دیاں''

''کر جیویں مرضی،

ایہہ ہُن شاعری تیری اے''